Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaevtyń sarabdal saıasatynyń nátıjesinde Saryarqa tórinde táýelsiz elimizdiń tarıhyndaǵy jańa, kórikti elordamyz boı kótergeni bárimizge málim. Elorda egemendikke qol jetkizgen kúlli qazaqtyń tilegi edi. Sol tilegimiz qabyl bolyp, bas qalamyz tiregimizge aınaldy.
Búginde talaı taǵdyrlar toǵysqan Nur-Sultan shahary - álemniń eń ádemi astanalarynyń biri, onyń kórikti kelbetine tańqalmaıtyn jan tabylmas. Araıly astana taqyrybynda qanshama júrekjardy óleńder, áýezdi áýender, ásem ánder jazyldy. Kúnnen kúnge damyp kele jatqan Alashtyń astanasy - eldigimizdiń nyshany. San myńdaǵan adam osy qalamen bolashaǵyn baılanystyrǵysy keletini jasyryn emes. Iá, astana armandardyń qalasy. Eńseli elordamyzda kóptegen jastarymyz baǵyn taýyp, baqytyn eseledi. Bul jastardyń jumaq mekeni. Janǵa saıa saıabaqtar, gúldengen gúlzarlar, ǵajaıyp sýburqaqtar, aspanmen talasqan bıik-bıik ǵımarattar - bári de bas shahardyń shyraıyn kirgizip, jan bitkendi bolashaqqa jeteleıdi.
Asqaraly Alataý bókterinen astana arqa tósine kóshiriledi degende kóbisi kúmánmen qaraǵany tarıhı shyndyq. Alaıda, qazir arqa boıynda teńdesi joq jańa qala boı kótergenine barlyǵymyz kýá bolyp otyrmyz.
"Jańa Astana – ejelgi qazaq jeriniń tóri. Astana kelbeti – ult kelbeti. Astana – Otanymyzdyń júregi, Táýelsizdigimizdiń tiregi. Jańa Astana – táýelsiz Qazaqstan úshin jarqyn keleshektiń nyshany" - dep, Elbasynyń elordaǵa baǵa berýi, kóńilge qýanysh uıalatady. Qazaqstan Respýblıkasynyń Prezıdenti, Memleket basshysy Qasym-Jomart Kemeluly Toqaev elimizdiń ıgiligi úshin kóptegen jumystar atqarýda. Bas qalamyzdy jan-jaqty damytý baǵyttaryn aıqyndap, budan da kóriktene túsýine qoldaý kórsetýde. Al, óner qaıratkerleri, talapty da talantty jastar óz shyǵarmashylyǵy arqyly astananyń sulý kelbetine ún qosyp, ádemiligin áspettep, mádenıet pen órkenıetimizdiń órkendeýine zor úles qosyp keledi. Máselen, bıylǵy astananyń týǵan kúnine oraı, Nur-Sultan qalasy ákimdigi Memlekettik akademııalyq fılarmonııasynyń ónerpazdary qala turǵyndary men qonaqtaryna arnap erekshe formatta is-sharalar uıymdastyrdy (eldegi jaǵdaıǵa baılanysty barlyq sanıtarlyq talaptardy saqtaı otyryp). Shyǵarmashylyq ujymdar keme ústinde jáne eki qabattan turatyn avtobýspen shahar ishin aralap, tańǵajaıyp týyndylaryn halyqqa tartý etti. Sonymen qatar, «Ulttyq dombyra kúnin» atap ótip, urpaq úshin qajetti tyń aqparattarmen bólisip, ónerlerin ortaǵa saldy.
Iá, óner – halyqtyń rýhanı azyǵy, jany, júregi, týlaǵan qany. Araıly astananyń mádenıetin kóterýge at salysý kez kelgen qazaq ónerpazynyń paryzy dep esepteımin. Sebebi, barlyq ıgi bastamalar astanadan bastalady. Shyndyǵynda elorda – eldiń júregi. Endeshe, el júregi toqtamasyn! Týǵan kúnińmen, astana! Erlan Dakenov Nur-Sultan qalasy ákimdiginiń
"Memlekettik akademııalyq fılarmonııa" MKQK Bas dırektory