Elorda kúnine jáne Elbasynyń týǵan kúnine oraı jedelhattar men hattar kelip túsýde, dep habarlady Tuńǵysh Prezıdenttiń baspasóz qyzmeti.
Qazaqstannyń Tuńǵysh Prezıdentiniń atyna shetel memleketteri men úkimetteri basshylarynan kelip jatqan quttyqtaý jedelhattar legi jalǵasýda.
Túrkııa Prezıdenti Rejep Taııp Erdoǵan óz hatynda Elbasynyń táýelsiz Qazaqstannyń qalyptasýy men órkendeýindegi rólin erekshe atap ótti.
«Qazaqstannyń ıgiligi jolyndaǵy qyzmetińiz, mol tájirıbeńiz ben parasattylyǵyńyz О́zińiz úlken úles qosqan Túrki áleminiń birligi men tutastyǵyn nyǵaıtýda mańyzdy ról atqarady.
Osy múmkindikti paıdalana otyryp, Sizge jáne otbasyńyzǵa myqty densaýlyq, baqyt pen uzaq ǵumyr, al baýyrlas jáne dostas Qazaqstan halqyna amandyq pen baq-bereke tileımin», dep jazdy Rejep Taııp Erdoǵan.
Túrikmenstan Prezıdenti Gýrbangýly Berdimuhamedov Nursultan Nazarbaevtyń ómir joly, Otanyna degen súıispenshiligi men onyń taǵdyryna aralasýy jas urpaq úshin laıyqty úlgi ekenin atap ótti.
«Sizdiń 80 jyldyq mereıtoıyńyzǵa oraı meniń júrekjardy quttyqtaýym men izgi tilegimdi qabyl alyńyz.
Qazirgi tańda Qazaqstannyń qoǵamdyq-saıası ómiriniń barlyq salasynda qol jetkizgen tabystary, eldiń ekonomıkalyq damýyndaǵy eleýli jetistikteri, halyqaralyq arenadaǵy bedeliniń nyǵaıýy Sizdiń atyńyzben tyǵyz baılanysty», delingen Túrikmenstan Prezıdentiniń jedelhatynda.
Belgııa Koroli Fılıpp pen Mońǵolııa Prezıdenti Haltmaagıın Battýlga da ózderiniń quttyqtaýlarynda Tuńǵysh Prezıdentke jáne Qazaqstan halqyna baq-bereke tiledi.