Kún ótken saıyn Almatyda epıdemııalyq jaǵdaı kúrdelenip bara jatqany qazir eshkimge de qupııa emes. Megapolıste koronavırýs juqtyrǵandar sany 6 myńnan asyp jyǵyldy. О́kinishke qaraı bul san ósip barady. Qalada dári-dármek, dárigerler, jedel járdem, aýrýhanalarda oryn jetispeýshiligi bar.
Dúısenbide qala ákimi Baqytjan Saǵyntaev Almatydaǵy epıdemııalyq jaǵdaıdy turaqtandyrý úshin qabyldanyp jatqan sharalar legin egjeı-tegjeıli baıandap, jýrnalısterdiń saýaldaryna jaýap berdi.
Qala ákimi onlaın-brıfıng ótkizip jatqan kezde Almatyda indet juqtyrǵandardyń naqty sany 6202-ge jetip, koronavırýstyń kún saıynǵy órshýi 1,1 paıyzdy qurady. Bul kúnderi ınfeksııalyq stasıonarlarda 1772 adam emdelip jatyr. Megapolıstegi naýqastardyń 349-ynyń jaǵdaıy aýyr bolsa, 24-i hal ústinde. 1264 naýqastyń densaýlyǵy ortasha dep baǵalansa, 135 adam táýir bolyp keledi. Degenmen jaǵdaıy qıyn jáne aýyr pasıentterdiń sany artyp barady. О́z kezeginde pnevmonııa keseline shaldyqqan almatylyqtar qatary kúrt kóbeıgen. О́tken jyldyń osy ýaǵymen salystyrǵanda tynys joly aýrýlarynan kóz jumǵandar sany 68,6 paıyzǵa ósipti.
«Almatydaǵy juqpaly aýrýlar stasıonarlaryna kúndelikti 100-den astam adam kelip túsedi. Infeksııalyq aýrýlardy emdeıtin mundaı mekemelerdiń júktemesi 85% quraıdy. Mindet – 1 qyrkúıekke deıin juqpaly jáne ýaqytsha aýrýhanalardaǵy oryndy 6 myń tósek-orynǵa deıin arttyrý», dedi B.Saǵyntaev.
Qala basshysy eń basty maqsat aýyrǵan adamdardyń barlyǵynyń emdelýine jaǵdaı týdyrý ekenin atady. Bul máselede Almaty bıligi áreketsiz otyr dep aıtýǵa bolmaıdy.
B.Saǵyntaev birinshi kezekte Memleket basshysynyń stasıonarly kómek alýǵa qoljetimdilikti arttyrý jónindegi tapsyrmasy oryndalatynyna sendirip, osy aptanyń sońyna deıin aýrýhanalarda qosymsha 500 oryn ashylatynyn jetkizdi.
Qalada koronavırýs ınfeksııasynyń taralýyn boldyrmaý boıynsha barlyq baǵytta belsendi jumystar júrgizilip, ambýlatorlyq deńgeıde «vırtýaldy ınfeksııalyq aýrýhana» ashyldy.
Sonymen birge COVID-19 juqtyrǵan dárigerlik kómekke muqtaj naýqastardy táýlik boıǵy rejimde táýekel tobyndaǵy naýqastardyń asqynýlarynyń damýyn ambýlatorlyq deńgeıde baqylaıtyn Monıtorıng ortalyǵy jumysyn bastady. Atalǵan sharalar jaǵdaıy aýyr naýqastardy, ásirese qart adamdardy baqylaýda ustaýǵa múmkindik beredi.
«Epıdemııamen kúreste túbegeıli másele – barlyq aýyrǵan adamdardyń em alýy úshin qosymsha tósektik oryn qoryn qurý. Búginde qalada koronavırýspen kúreske qýaty 3 340 tósektik orynǵa shaqtalǵan 19 stasıonar jumyldyrylyp, aýrýhanalardaǵy oryn 7 esege kóbeıgen. Psıhıkalyq densaýlyq ortalyǵynyń negizinde qosymsha 150 oryn, Ýrologııa ǵylymı ortalyǵynyń negizinde 150 oryn ashyp, Halyk Arena bazasynyń negizinde 200 oryndy kezeńimen 1000-ǵa deıin ulǵaıtý kózdelip otyr. Osylaısha, osy aptanyń sońyna deıin qosymsha 500 tósektik oryn ázirlenedi. Sonymen birge Halyk Arena bazasynyń negizinde jan saqtaý bólimi, tıisti quraldary bar tolyqqandy stasıonar ashylady, naýqastarǵa ottegi oryndary qoljetimdi bolady», dedi qala basshysy.
Alǵashqy medısınalyq sanıtarlyq kómek nysandarynyń deńgeıinde mobıldi brıgadalar kúsheıtilýde, olardyń quramyna bólim meńgerýshileri, ınfeksıonıst dárigerler, epıdemıologter, ýchaskelik dárigerler jáne meıirbıkeler engen. Qazirgi ýaqytta 72 brıgada mobılızasııalandy jáne AMSK 297 qyzmetkeri jumyldyryldy.
ALMATY