Elorda kúnine jáne Tuńǵysh Prezıdent-Elbasy Nursultan Nazarbaevtyń 80 jyldyǵyna oraı bas qalada "Uly eldiń murasy" atty fotokórmeler men qundy tarıhı qujattardyń kórmesi ótýde. Bir aptaǵa, ıaǵnı shildeniń 10-juldyzyna deıin jalǵasatyn kórmeni ótkizýge Nur-Sultannyń memlekettik arhıvi muryndyq bolǵanyn aıta keteıik.
Qalanyń oń jaǵalaýdaǵy tarıhı bóliginde, "Kópes Vasılı Kýprın Úıiniń" irgesinde ótip jatqan kórmedegi tarıhı qujattardyń úlkeıtilgen kóshirmesi men fotoderekterdi tamashalaý arqyly bas qalanyń qalyptasýy men damýyna qatysty eń qyzyqty degen aqparattarǵa qanyǵýǵa bolady.
– "Uly eldiń murasy" atty osy fotoqujat kórmesi ótken ǵasyrdyń 1990-shy eyldarynan bastap, búginge deıingi bir ǵasyrdan astam kezeńdi qamtıdy. Ekspozısııaǵa Nur-Sultan qalasynyń memlekettik arhıvinen, QR Tuńǵysh Prezıdenti-Elbasynyń kitaphanasynan, QR Prezıdenti arhıvinen júzge jýyq fotomaterıal men arhıv qujattary qoıyldy. Astanamyzdyń tarıhyndaǵy eń taǵdyrly kezeńder týraly derekterdi jan-jaqty qamtýǵa tyrystyq, – deıdi uıymdastyrýshylar.
Tuńǵysh Prezıdent N.Nazarbaev elimizdiń áleýmettik mańyzy zor nysandarynyń ashylý rásimine qatysýy, álemdik kóshbasshylarmen kezdesý kadrlary, halyqaralyq uıymdardyń sammıtterinen áserli sátter de nazardan tys qalǵan joq. Bul astananyń irgetasy qalanǵan kezeńnen bastap, Táýelsizdik jyldaryndaǵy tarıhyna deıingi aralyqtaǵy tarıhyna ekspozısııalar arqyly sholyp shyǵýǵa typtyrmas múmkindik ekeni anyq.
Bir aıta keterligi, kelýshilerge yńǵaıly bolýy úshin QR kod arqyly memlekettik arhıvtiń saıtyna enip, materıaldarmen tereńirek tanysýǵa da múmkindik jasalǵan.
Elimizde qalyptasqan epıdemıologııalyq ahýalǵa baılanysty, ekspozısııalar ashyq aspan astynda, bir-birinen birshama qashyqtaý etip qoıylǵan. Halyqtyń ózara áleýmettik qashyqtyqty saqtaýy úshin saqtyq sharalary týraly eskertýler de bar.