Aqtóbe oblysynda qatań shekteý jáne karantındik sharalar engizildi. Qaýlyǵa oblystyń bas memlekettik sanıtarlyq dárigeri Nursulý Berkimbaeva qol qoıdy. Mundaı qujat bıyl kóktemniń alǵashqy aıynda da qabyldanǵany belgili. Degenmen KVI-diń taralýyn boldyrmaý jónindegi alǵashqy qaýlymen salystyra qaraǵanda sońǵysynyń salmaǵy ájeptáýir aýyr, jaýapkershiligi barynsha joǵary.
О́ıtkeni sońǵy ýaqytta aýyldaǵy aǵaıyndar arasynda da KVI men vırýstyq pnevmonııa deregi órship barady. Yrǵyz jáne Oıyl sekildi shalǵaıdaǵy aýdandarda atalǵan juqpaly dertti juqtyrǵan turǵyndar sany kóbeıdi. Aýyldaǵy aýrýhanalar janynan qosymsha ınfeksııalyq bólimsheler ashylyp, provızorlyq stasıonardaǵy kereýetter sany keńeıtilýde. Emhanalar janynan kúndizgi em júrgizetin oryndar ashyldy. Arnaıy senim telefondary men onlaın keńester de aýyl turǵyndarynyń aqparattyq suranysyn óteýge qyzmet etedi. Bul jóninde Oıyl aýdandyq aýrýhanasynyń bas dárigeri Sándibek Nurbaev aıtyp berdi.
Búginde oblys aýmaǵynda pýlmonolog mamandarǵa suranys kúrt artty. Sondyqtan maman tapshylyǵyn retteýdiń bir joly retinde nefrolog, terapevt jáne hırýrgterdi arnaıy hattama boıynsha ókpege em júrgizýge ruqsat pen quqyq berý sharalary qolǵa alynǵan. Sondaı-aq aýdandarda dári-dármekter tapshylyǵy da baıqalady. Bul máseleni shuǵyl sheshý jóninde sharalar bekitilgen.
Alǵashqy karantın kezinde Aqtóbe oblysynda epıdemııalyq jaǵdaı turaqty bolǵany málim. Tipti bir de bir KVI juqtyrǵan turǵyn tirkelmegen kúnder de kezdesti. Osyǵan qarap indet sharyqtaý shaǵyna jetti dep oı qorytýdyń da jóni bar edi. Áıtse de elimizdegi eki aıǵa sozylǵan tótenshe jaǵdaı rejiminen keıin blok-beketter alynyp, aýyldar men oblys ortalyqtary arasyndaǵy qarym-qatynas qalpyna kelgen kezde shalǵaı eldi mekenderde indetke shaldyǵýshylar kezdese bastady. Sebebi aǵaıynnyń duǵa, quran baǵyshtaý dastarqandary men ózge de otbasylyq sharalarǵa birden bas qoıýy, aýyl men qala turǵyndarynyń aralasyp ketýi, sımtompsyz azamattar indettiń taralýyna túrtki boldy.
Tótenshe jaǵdaı men qatań karantındik rejimdi árige soza túsý kerek edi deýshiler de bar. Bul tujyrymdar bir qaraǵanda qısyndy sekildi kóringenimen sanıtarlyq normalar men qaýipsizdik talaptary oryndalmaǵan jaǵdaıda memleket tarapynan belgilengen kez kelgen qatań sharanyń ózi indetti aýyzdyqtaýǵa kómektese almaıtynyn uǵyna alsaq kerek-ti.
Aqtóbe oblysynda 2020 jyldyń shilde aıynyń tórtinshi juldyzy kúni Taýarlar men kórsetiletin qyzmetterdiń sapasy men qaýipsizdigin basqarý departamenti men oblystyń bas sanıtar dárigeri qabyldaǵan qaýly tarmaqtary buǵan deıingi qaýlymen salystyrǵanda edáýir keńeıtilgenin aıtý shart. Munda shekteý sharalary jónindegi tarmaqtar men joldar da qyzmet kórsetý nysandaryn barynsha keń qamtydy. Bul qabyrǵaly qujat talaptary qaǵaz júzinde nemese elektrondy mátin túrinde qalyp qoımaı, tolyqtaı oryndalsa epıdemııany aýyzdyqtaýǵa oń septigin tıgizetini anyq. Qaýly tek oryndalýmen ǵana qundy.
AQTО́BE