Keshe oblys ákimi Gúlshara Ábdiqalyqova óńirlik kommýnıkasııalar qyzmetinde baspasóz máslıhatyn ótkizdi. Onlaın rejimde ótken sharada aımaq basshysy óńirde epıdemııalyq jaǵdaıǵa baılanysty atqarylyp jatqan sharalar týraly aıtyp, saýaldarǵa jaýap berdi.
Oblys basshysy apta basynda turǵyndar talabyna saı qajetti sharalardy kúsheıtip, týyndaǵan máselelerdi jedel sheshý úshin qaladaǵy birqatar aýrýhanalar men dárihanalardy aralaǵanyn atap ótti. Aralaý barysynda ınfeksııalyq jáne provızorlyq tósektik oryndar sanyn kóbeıtý qajettigi anyqtalǵan. Osy kúni oblys aýmaǵyndaǵy ınfeksııalyq stasıonarlarda 515, provızorlyq stasıonarda 1730 tósektik oryn bar. Odan bólek, tez arada oblystyq ftızıopýlmonologııa ortalyǵy bazasynda qosymsha 120 oryndyq ınfeksııalyq jáne Jańaqorǵan aýdanyndaǵy Shalqııa eldi mekeninen 30 tósektik provızorlyq oryn ashylady. Oblys basshysy óńirde naýqastar úshin oryn tapshylyǵy joqtyǵyn, eger qajettilik týyndaǵan jaǵdaıda jeke klınıkalardy da ońtaılandyryp paıdalanýǵa kelisim jasalǵanyn aıtyp ótti.
– Medısına mekemelerin aralaý barysynda birqatar aýrýhana basshylary negizgi problemalardyń biri retinde ottegi ballondarynyń jetispeýshiligin aıtyp otyr. Osyǵan baılanysty, óndirýshi mekemelermen birlese otyryp sala basshylary men qala, aýdan ákimderi aýrýhanalardy úzdiksiz jáne jetkilikti kólemde ottegi ballondarymen qamtamasyz etýdiń barlyq múmkindikterin qarastyrýda. Sonymen qatar oblystyq kópbeıindi aýrýhana janynan ottegi óndiretin seh salý jumystary qolǵa alynyp, oblystyq bıýdjetten 80 mln teńge qarjy bólindi, – dedi Gúlshara Naýshaqyzy.
Osy mamyr aıynda ókpeni jasandy jeldetetin 20 qurylǵy alynǵan, taǵy 63-ine tapsyrys berildi. El jaǵdaıyna alańdaǵan jergilikti kásipkerlerdiń de osyndaı apparattar alýǵa qoldaý bildirip otyrǵany qýantady.
Dárihanalarda vırýsqa qarsy preparattar bar, alaıda dıstrıbıýtorlar tarapynan tapsyrysta kórsetilgen kólem tolyǵymen jetkizilmeı otyr. Sońǵy bir apta kóleminde oblys dárihanalarynda 3 aıǵa jetetin dári-dármek satylyp ketip, jetispeýshilik týyndady. Tek Qyzylorda emes, kúlli el boıynsha osyndaı kórinis baıqalýda. Medısınalyq stasıonarlarda 45 kúnge jetetin dári-dármek qory bar.
– Turǵyndar arasynda dárihanalarda dári-dármekterdiń baǵasynyń retsiz ósýine baılanysty shaǵym kóp. Bul baǵytta oblystyq taýarlar men kórsetiletin qyzmetter sapasy men qaýipsizdigin baqylaý departamenti jumys atqarýda. Sondaı-aq qala, aýdan ákimdikteri jáne Nur Otan partııasynyń oblystyq fılıaly janynan qurylǵan arnaıy toptar dári-dármek baǵasy men kólemine qatań baqylaý jasaıdy, – dedi oblys basshysy.
Turǵyndar dárihanalarda dári baǵasynyń retsiz ósýi týraly derekterdi tıisti oryndarǵa elektrondy túrde nemese 40-00-01, 109 nómirli «Jedel jeli» arqyly habarlasyp, jetkize alady. «Jedel jeli» táýlik boıy jumys isteıdi.
Qazir oblystaǵy «Jedel járdem» qyzmetine júkteme 2 esege ósip, dıspetcherler men qyzmetkerlerdiń jetispeýshiligi baıqalyp otyr. Osyǵan baılanysty oblysta medısına mamandyǵy bar jas mamandar men eriktilerdi jumysqa tartý sharalary qolǵa alynýda. Al úıden em alýshylarǵa qosymsha kómek berý maqsatynda 50-den astam dárigerlik mobıldik top quryldy.
Qyzylorda oblysy