Parlament Senatynyń Tóraǵasy Qasym-Jomart Toqaev Qazaqstanǵa Memleket basshysy N.Á.Nazarbaevtyń shaqyrýymen arnaıy kelgen BUU Bas hatshysy Pan Gı Mýnmen kezdesti.
Q.Toqaev pen Pan Gı Mýnnyń Astanadaǵy osy kezdesýi halyqaralyq qatynastar salasyndaǵy ejelden áriptes dostardyń kezdesýi boldy. Qyzmet babyna sáıkes olar buryn da talaı márte kezdesken. Qasym-Jomart Kemeluly joǵary mártebeli meımannyń Semeı polıgonynda, Kýrchatov qalasynda bolýyna jáne jahandyq qarýsyzdaný úderisteri men ıadrolyq qarýdy taratpaý tártibin nyǵaıtýdaǵy Qazaqstannyń róline oraı mańyzdy málimdemesine rızashylyq bildirdi. “Sizdiń saparyńyzdy qazaqstandyqtar rızashylyqpen eske alatyn bolady”, – dedi Tóraǵa óz sózinde. Qazaqstan Birikken Ulttar Uıymynyń saıasatyn jan-jaqty qoldaıdy.
Pan Gı Mýn qarýdy taratpaý jáne ıadrolyq qaýipti eńserý salasyndaǵy Qazaqstannyń belsendi róli, osy sala boıynsha bekitilgen halyqaralyq kelisimderdi bizdiń memleketimiz qatań saqtaıtyny BUU-da keńinen tanymal ekenin atap ótti. Ol Qazaqstannyń álemdik saıasattaǵy ózekti máselelerge teńgerimdi jáne naqtyly qadamdary BUU Bas Assambleıasynda jaqsy belgili ekenin, al elimizdiń Prezıdenti Nursultan Nazarbaevtyń bastamalary men is-qımyly osynaý halyqaralyq uıym tarapynan túsinistik pen qoldaý taýyp otyrǵanyn atap ótti.
“Biz ıadrolyq qarýdan bas tartý jónindegi Qazaqstannyń dana jáne batyl sheshimin joǵary baǵalaımyz, 29 tamyzdy BUU Iаdrolyq synaqtarǵa qarsy is-qımyldyń halyqaralyq kúni retinde jarııalaı otyryp, ony tarıhı kún dep esepteımiz”, dedi Pan Gı Mýn. Sondaı-aq ol sáýirdiń ortasynda ıadrolyq qaýipsizdik jónindegi jahandyq sammıtke Qazaqstan men AQSh basshylarynyń qatysýy búkil álemdegi ıadrolyq qaýipti azaıtý isine qomaqty úles bolyp qosylatynyn atap kórsetti. Bas hatshy, sonymen qatar, halyqaralyq quqyqtyń negizgi qaǵıdalary men kedeıshilikpen kúreske, ekonomıkalyq jáne saıası reformalardy ilgeriletýge, aımaqtyq ıntegrasııa men yntymaqtastyqty damytýǵa baǵyttalǵan Qazaqstan basshysynyń mańyzdy bastamalaryn zańnamalyq turǵyda qamtamasyz etý jónindegi qazaqstandyq parlamentshilerdiń qyzmetin joǵary baǵalady.
Jyly shyraıly kezdesý sońynda Qasym-Jomart Toqaev jer júzindegi qaýipsizdikti qamtamasyz etý jónindegi Pan Gı Mýnnyń qyzmetine rızashylyq bildirdi jáne BUU Bas Assambleıasynyń ókilderin aldaǵy mamyrda ótetin Transazııalyq parlamenttik jıynǵa qatysýǵa shaqyrdy.
Asqar TURAPBAIULY.