Soltústik Qazaqstan oblysynyń Petropavl qalasynda bıznesmendi óltirgen aıypkerge qatysty sot úkimi shyqty. Bul týraly Tengrinews.kz habarlady.
Sottalýshy A.Abdýllaevqa qatysty is bir jylǵa sozylǵan bolatyn. Endi ol 11 jyl ómirin túrmede ótkizedi. Sondaı-aq aıyptalýshy jábirlenýshige materıaldyq, moraldyq shyǵyndy óteýi tıis. «Eskendirovtiń Abdýllaevqa qatysty talap aryzy ishinara qanaǵattandyrylsyn. Aıyptalýshydan materıaldyq shyǵyn úshin 2 mln. 125 myń teńge, al moraldyq shyǵyn úshin 1 mln. teńge óndirilsin», -dep jazylǵan Petropavl qylmystyq ister jóninde mamandandyrylǵan aýdanaralyq sotynyń úkiminde. Alaıda, jábirlenýshiniń advokaty sýdıa taǵaıyndaǵan jaza merzimine kelispeıtinin aıtyp,oblystyq sotqa shaǵym túsiretinin málimdedi.
О́tken jyldyń qarasha aıynda jergilikti jerdegi «Okean» dúkeni janynda Mercedes kóligi ishinde bolǵan bıznesmen Seıdýlla Eskendirovti belgisiz bireý basynan atyp ketedi. Artynan bıznesmendi óltirgen kúdikti óz aıaǵymen polısııa bólimine kelip, bolǵan jaıdy baıandaıdy. Bıznesmen bıdaı tasymaly úshin A. Abdýllaevqa 30 mln. teńge qaryz bolǵan kórinedi. Ol osy qaryzyn kólik ishinde suraǵan kezinde bıznesmen qarsylyq kórsetken. Sosyn qyzbalyqqa salynǵan aıyptalýshy ańshy myltyǵymen bıznesmen basynan atqan.
Baqytbek Keneshuly.