Qazaqstandyq aralas jekpe-jek sheberi Jalǵas Jumaǵulov jeksenbi kúni álemdegi eń tanymal uıym – UFC-de alǵashqy aıqasyn ótkizip, tóreshilerdiń sheshimi boıynsha qarsylasyna ese jiberdi.
Ábý-Dabı (BAÁ) qalasyndaǵy «Jaýyngerler aralynda» ótken UFC 251 týrnırinde qandasymyz 24 jastaǵy brazılııalyq Raýlıan Paıvamen judyryqtasyp, úsh raýndqa sozylǵan jekpe-jekte tóreshiler sheshimi boıynsha (29-28, 29-28, 29-28) jeńilip qaldy. Nátıjege qarap kezdesý otandasymyz úshin aýyr ótti dep aıta almaımyz. Birinshi raýndta Raýlıan aıqas tizginin qolyna alyp, azdaǵan basymdyqqa ıe boldy. Dese de ekinshi raýndty qandasymyz shıraq bastady. Alǵashqy jáne sońǵy mınýttarda Jalǵas qarsylasyn aýyr soqqynyń astyna aldy. Úshinshi bes mınýtta da jerlesimiz jaman óner kórsetken joq edi. О́kinishke qaraı, Jumaǵulov úshin UFC uıymyndaǵy debıýtti kezdesýi sátsiz bastaldy.
Jalpy, Jalǵastyń qarsylasyn joǵary deńgeıdegi myqty sportshy dep aıta almaımyz. О́ıtkeni atalǵan uıymda úsh aıqas ótkizgen Paıva bir ret jeńiske jetip, ekeýinde jeńilistiń kermek dámin tatqan.