Memleket basshysy Qasym-Jomart Toqaevtyń Jarlyǵyna sáıkes, qyzmettik boryshyn úlgili atqarǵany, azamattardyń densaýlyǵyn saqtaýdaǵy tabandy eńbegi úshin medısına salasynyń marqum bolǵan birqatar qyzmetkeri nagradtaldy. Bul týraly Prezıdenttiń baspasóz hatshysy Berik Ýálı Facebook paraqshasynda habarlady.
«Memleket basshysynyń 2020 jylǵy 13 shildedegi №370 Jarlyǵyna sáıkes Qazaqstan Respýblıkasyna sińirgen asa úzdik eńbegi, qyzmettik boryshyn atqarý ústinde kórsetken janqııarlyq jumysy úshin joǵary dárejeli erekshelik belgisi – «Qazaqstannyń Eńbek Eri» ataǵy, aıryqsha erekshelik belgisi – Altyn Juldyz ben «Otan» ordeni Aqmola oblysynyń densaýlyq saqtaý basqarmasy janyndaǵy «Kókshetaý qalalyq kópbeıindi aýrýhanasy» MKK bólimshe meńgerýshisi Oleg Nıkolaevıch Isaevqa (marqum) jáne «Aqtóbe oblystyq klınıkalyq juqpaly aýrýlar aýrýhanasy» MKK bas dárigeri Qalıhan Esbosynuly Qozbaǵarovqa (marqum) berildi.
Sondaı-aq, osy Jarlyqqa sáıkes Qazaqstan Prezıdenti qyzmettik boryshyn úlgili atqarǵany, azamattardyń densaýlyǵyn saqtaýdaǵy tabandy eńbegi úshin medısına salasynyń marqum bolǵan birqatar qyzmetkerlerin «Barys», «Parasat» jáne «Qurmet» ordenderimen nagradtady. Olardyń qatarynda óńirlerdegi mamandandyrylǵan aýrýhanalar men medısınalyq ortalyqtardyń dárigerleri, bólim meńgerýshileri, ınfeksıonısteri, sonymen qatar jedel medısınalyq járdem stansasynyń meıirgerleri, feldsherleri, sanıtarlary, qatardaǵy qyzmetkerleri men kólik júrgizýshileri bar», dep jazdy Prezıdenttiń baspasóz hatshysy óziniń Facebook paraqshasynda.