Qyzylorda qalasyndaǵy emdeý mekemelerine ottegi ballondaryn jetkizý jolǵa qoıylyp, bul iske kásipkerler, eriktiler, qoǵamdyq uıym ókilderi úles qosyp otyr.
Bir jutym aýaǵa zárý bolyp jatqan jandarǵa «Abzal ı K» sharýa qojalyǵynyń basshysy Maǵjan Erálıev 700 ballon alyp bergen. Dál osyndaı kólemdegi kómek oblystyq máslıhat depýtaty Rasýl Esenovten, «Aqtóbe ı K» JShS dırektory Nurlan Izdibaevtan da kelip túsipti. «Abaı-Dáýlet» sharýashylyǵynyń jetekshisi Murat Sársenbaev 300, jeke kásipker Nurjan Baıjigitov 50 ottegi ballonyn bergen. Isker azamattar men qoǵamdyq uıymdardan jınalǵan kómekti Ashat Baıdáýletov basqaratyn «El Araı» qoǵamdyq birlestigi tegin tasymaldap jatyr. Qala ákiminiń orynbasary Asqarbek Esjanov bul iske qoǵam belsendileriniń, volonterlerdiń kóp úles qosyp otyrǵanyn aıtady. Volonterler ottegi ballondarymen birge dári-dármek jetkizýdi de uıymdastyryp, qınalǵandarǵa qol ushyn sozýda.
– Osy ýaqytqa deıin bir emdeý mekemesiniń suranysy 25-30 ballonnan aspaıtyn. Qazir qalalyq aýrýhananyń ózi bir kúnde 160-170 ballonǵa tapsyrys beredi. Árıne qazir paıda oılaıtyn ýaqyt emes, emhanalar men aýrýhanalarǵa barynsha arzan baǵada qyzmet kórsetip otyrmyz, – deıdi «Shyńǵys LTD» JShS basshysy Erik Júnisov.
Turǵyndar tarapynan shaqyrtýlardyń kúrt kóbeıýine baılanysty 29 maýsymnan bastap oblys ortalyǵyndaǵy emhanalar qala ákimdigi balansyndaǵy 23 qyzmettik kólikti paıdalana bastady. Mamandar osy kóliktermen 1 500-den astam shaqyrtýǵa baryp, jurtqa dárigerlik kómek kórsetken. Qala ákiminiń orynbasarlary, apparat basshysy jáne derbes bólim basshylary shahar aýmaǵyndaǵy barlyq aýrýhanalar men emhanalarǵa jaýapty bolyp bekitildi.