Qyzylorda oblysynda bıylǵy jartyjyldyqta negizgi alty ekonomıkalyq kórsetkishtiń beseýi tómendep ketken. Oblystaǵy qurylys jumystary 68,2, ınvestısııa tartý 49,5 paıyzǵa azaıǵan. Áleýmettik mańyzy bar azyq-túlik taýarlary baǵasy da respýblıkalyq kórsetkishten joǵary bolyp tur.
Alty aılyqtyń qorytyndysyna arnalǵan keńeıtilgen májiliste oblys ákimi Gúlshara Ábdiqalyqova osy máseleni basa aıtyp, aımaqta koronavırýs indetimen kúresý baǵytyndaǵy atqarylyp otyrǵan jumystarǵa, «Jumyspen qamtý jol kartasy» memlekettik baǵdarlamasy aıasynda jańa jumys oryndaryn ashý máselesine toqtaldy.
Jıynda baǵany turaqtandyrý baǵytynda jiberilgen kemshilikteri úshin Jańaqorǵan men Aral aýdany ákimderine qatań eskertý jarııalandy. Qyzylorda qalasy men aýdan basshylaryna kókónis jáne basqa da áleýmettik azyq-túlik baǵalaryn ósirmeı, baıqalǵan faktiler boıynsha sharalar qabyldaýdy tapsyrdy. Ákimder ýaqyt ozdyrmaı kórshiles oblystarǵa shyǵyp, halyqty arzan ónimdermen qamtamasyz etýdiń qamyn jasaýy kerek.
– Kartop 63, al sábiz ben pııaz 50 paıyzǵa qymbattaǵan. Qys pen kóktem bolsa birsári, al kókónis pise bastaıtyn dál qazirgi kezeńdegi bul kórsetkish tipti aqylǵa syımaıdy. Barlyq aýdandarda baǵalardyń negizsiz ósýine jol berilgen, sonyń ishinde Jańaqorǵanda 7, Aral men Qyzylorda qalasynda 6 túrli azyq-túliktiń baǵasy kóterilgen, – dedi Gúlshara Ábdiqalyqova.
Bıyl kóktemgi egis naýqany kezinde ákimdikterge sý tapshylyǵyna baılanysty kúrish kólemin shekteý tapsyrylǵan edi. Biraq sol eskertýdi elemegenderdiń artyq ekken egini sýdan qalyp, dıqandardyń eńbegi esh bolyp otyr. Mysaly, statıstıkalyq esep boıynsha oblysta 89 623 gektarǵa kúrish egilgen. Onyń 8 492 gektary artyq. Shıeli aýdany 12 200 gektar alqapqa kúrish ekkendigi týraly esep bergenimen, naqty 14 353 gektarǵa dán sebilipti. Qazir osy aýdandaǵy 3 sharýashylyqtyń 720 gektardan astam kúrishine sý jetpeı, kúıip ketip otyr. О́ńir basshysy berilgen tapsyrmany merziminde oryndamaı, kúrish kólemin qoldan ulǵaıtyp, sý tapshylyǵyna ákep soqtyrǵany úshin Shıeli aýdanynyń ákimine sógis jarııalady.
«Qarapaıym zattar ekonomıkasy» baǵdarlamasy boıynsha da joba usynbaǵan aýdandar bar. Sońǵy 6 aıda baǵdarlama aıasynda quny 788,6 mln teńge bolatyn 37 joba maquldansa, onyń basym bóligi Jańaqorǵan aýdanyna tıesili bolyp otyr.
– Al Aral aýdanynda birde-bir joba joq. Bul memlekettik baǵdarlamanyń oryndalmaǵanyn bildiredi. Jaǵdaı bulaı jalǵasa berse, aýdan basshysynyń tártiptik jaýapkershiligin qaraımyz. Bul barlyq basqarma basshylary men qala, aýdan ákimderine qatysty. Baǵdarlama sheńberinde Qyzylorda qalasy 10 mlrd, al barlyq aýdan ákimdikteri 2 mlrd teńgege jýyq mejeni ıgerý boıynsha jumystardy jalǵastyrýy tıis, – dedi óńir basshysy.
«Jumyspen qamtýdyń jol kartasy» aıasynda oblysta 276 jobany júzege asyrýǵa 37 mlrd teńgege jýyq qarjy bólingen. Bul qarajat pandemııa ýaqytynda 9300 jańa jumys ornyn ashyp, halyqtyń áleýmettik jaǵdaıyn jaqsartýǵa baǵyttalýy kerek. Qazir 276 jobanyń 270-si boıynsha jumystar bastalǵan. Jumys ornyn qurý kórsetkishkeri Qyzylorda qalasynda 39,4 jáne Aral aýdanyna 46,1 paıyz. О́ńir basshysy qala men aýdan ákimderine aı sońyna deıin jańa jumys oryndary kórsetkishin 50 paıyzdan asyrýdy júktedi.
Aımaq basshysy bıýdjet shyǵystaryn ońtaılandyrý máselesin de eske saldy. Sonymen qatar «Sıfrly Qazaqstan» baǵdarlamasyndaǵy barlyq kemshilikter túzelip, jyl sońyna deıin óńirdegi 250-den astam turǵyny bar eldi mekender sapaly ınternetpen qamtylýy qajet.
Jıynda jaqynda ǵana taǵaıyndalǵan oblystyq densaýlyq saqtaý basqarmasynyń basshysy Sábıt Pazylovtyń baıandamasyn tyńdaǵan aımaq basshysy tez arada indetpen kúresý baǵytynda arnaıy jospar jasap, bekitýge usynýdy tapsyrdy.
Qyzylorda oblysy