Keshe Parlament Senatynda «Táýelsiz Qazaqstannyń syrtqy saıasaty: basymdyqtary jáne perspektıvalary» taqyrybyna arnalǵan Úkimet saǵaty ótti, dep habarlady osy palatanyń baspasóz qyzmeti.
Is-sharaǵa Parlament depýtattary, Prezıdent Ákimshiligi men Úkimettiń Parlamenttegi ókildikteriniń basshylary, elimizdiń Syrtqy ister mınıstri, basqa da memlekettik organdardyń ókilderi qatysty.
Keshe Parlament Senatynda «Táýelsiz Qazaqstannyń syrtqy saıasaty: basymdyqtary jáne perspektıvalary» taqyrybyna arnalǵan Úkimet saǵaty ótti, dep habarlady osy palatanyń baspasóz qyzmeti.
Is-sharaǵa Parlament depýtattary, Prezıdent Ákimshiligi men Úkimettiń Parlamenttegi ókildikteriniń basshylary, elimizdiń Syrtqy ister mınıstri, basqa da memlekettik organdardyń ókilderi qatysty.
Úkimet saǵatyn Parlament Senaty Tóraǵasynyń orynbasary Qaırat Ishanov ashty. Tóraǵa orynbasary óz sózinde Qazaqstannyń syrtqy saıasaty álemdik qoǵamdastyqpen dostyq jáne ózara tıimdi qatynastardy nyǵaıtýǵa baǵyttalǵanyn atap kórsetti. Elimizdiń Syrtqy ister mınıstrligi bul baǵytta aýqymdy jumystar atqaryp keledi. Syrtqy saıasat máselesi erekshe kóńil bólýdi qajet etedi, sondyqtan Parlament Senatynyń Halyqaralyq qatynastar, qorǵanys jáne qaýipsizdik komıteti Qazaqstan Respýblıkasy Syrtqy ister mınıstriniń qatysýymen Úkimet saǵatyn ótkizý jaıynda bastama kótergen bolatyn, dedi ol.
Jıynǵa qatysýshylar aldynda negizgi baıandamany elimizdiń Syrtqy ister mınıstri Erlan Ydyrysov jasady. Ol óz sózinde Memleket basshysy «Qazaqstan-2050» Strategııasynda belgilep bergen mindetterdi iske asyrý aıasynda syrtqy saıası qyzmettiń budan bylaıǵy negizgi basymdyqtaryna toqtaldy. E.Ydyrysov Qazaqstan aldaǵy ýaqytta da halyqaralyq uıymdar jáne eń aldymen, Birikken Ulttar Uıymy aıasynda belsendi jumystardy jalǵastyra berýge nıettenip otyrǵanyn atap ótti. «О́ńirlik jáne jahandyq qaýipsizdik máselesi erekshe nazar aýdarýdy qajet etedi. Qaýipsizdik máselelerinde Qazaqstan róliniń nyǵaıa túsýi, birinshi kezekte Memleket basshysy birneshe ret aıtqan jekelegen halyqaralyq jaǵdaılar boıynsha syndarly usynystarǵa baılanysty bolyp otyr. Olardyń kóbi búgingi tańda álemdik saıasatta júzege asýda jáne bizdiń bul úshin erekshe jaýapty ekenimiz aıqyn. Sonymen qatar, Qazaqstan Shanhaı yntymaqtastyq uıymy, Islam Yntymaqtastyq Uıymy, Ujymdyq qaýipsizdik sharty uıymy, Azııadaǵy ózara is-qımyl jáne senim sharalary jónindegi keńes sııaqty uıymdar sheńberinde de úlken jumys atqardy jáne bul jumysty jalǵastyra beremiz», dedi baıandamashy.
Sondaı-aq, mınıstr óz sózinde eldiń ekonomıkalyq áleýetiniń arta túsýi, ekonomıkanyń ındýstrııalyq-ınnovasııalyq baǵdarda bolýy jáne eldiń ınvestısııalyq ahýalynyń jaqsarýyna baılanysty máseleler bizden «ekonomıkalyq dıplomatııany» údete túsýdi qajet etedi. Biz Eýropalyq Odaqpen, Azııa elderimen yntymaqtastyqty keńeıtýge, sondaı-aq EýrAzEQ aıasynda úılestirý jónindegi jumysty jalǵastyrýdy nıet etip otyrmyz, dedi.
Úkimet saǵatynda Halyqaralyq qatynastar, qorǵanys jáne qaýipsizdik komıtetiniń tóraǵasy Ikram Adyrbekov te sóz sóıledi. Ol beıbitshilik súıgishtik ári syrtqy tepe-teńdik saıasaty arqasynda Qazaqstan halyqaralyq arenada tanylyp, álemniń birqatar jetekshi memleketterimen strategııalyq áriptestik deńgeıine kóterildi dep atap ótti.
I.Adyrbekov óz sózinde: «Parlamentaralyq forýmdarda halyqaralyq kún tártibindegi ózekti máselelerge ortaq kózqarastar qalaı tujyrymdalyp, parlamentshiler arqyly ulttyq múddelerdiń qalaı ilgeriletilip jatqanyn kórip otyrmyz. Sóz joq, parlamenttik dıplomatııanyń áleýeti zor, sondyqtan Memleket basshysy qoıǵan syrtqy saıasat mindetterin iske asyrý úshin ony jandandyrý jónindegi jumysty jalǵastyrý kerek», dedi.
Sonymen qatar, I.Adyrbekov zań shyǵarý qyzmeti sheńberinde Parlament pen Syrtqy ister mınıstrligi arasyndaǵy ózara is-qımyl máselelerine nazar aýdardy. Ol, tutastaı alǵanda, elimizdiń Parlamenti men syrtqy saıasat mekemesi arasynda Qazaqstannyń múddelerin qorǵaýǵa baǵyttalǵan syndarly jumys júrgizilip jatyr, dep sózin qorytyndylady.
Shara barysynda E.Ydyrysov senatorlardyń kóptegen saýaldaryna jaýap berdi.