Túrkistan oblysy Maqtaaral aýdanyndaǵy sý basqan Fırdoýsı aýylyn qalpyna keltirý jumystary qarqyndy júrgizilýde. Eldi mekende 302 úı 17 mıllıon teńge ótemaqyny alý úshin kelisimshartqa turǵan.
Olardyń barlyǵyna birinshi transh boıynsha 17 mıllıon teńgeniń 50%-y aýdarylyp, qazirgi tańda qurylys jumystary jappaı júrýde. Sondaı-aq, ekinshi transh boıynsha 2 úıge joǵaryda atalǵan qarjynyń 25%-y aýdarylǵan. Aýdan ákimdigi baspasóz qyzmetiniń habarlaýynsha, qazirgi tańda 266 úıdiń irgetasy qalanyp, 138 úıdiń qabyrǵasy órilýde. Sonymen qatar, 19 úıdiń shatyry jabylǵan. Budan bólek, 36 úıdiń qurylys alańy daıyndalyp, qurylys jumystaryn bastaý úshin retke keltirilgen. Osy ýaqytqa deıin aýylda 314 úıge buzý jumystary jasalǵan. Jalpy aýylda 1093 qurylysshy 24 ujymǵa birigip, eńbek etýde. Buǵan deıin О́zbekstan Respýblıkasy tarapynan fırdoýsılyqtarǵa úılerdi buzý úshin arnaıy tehnıkalar kómek bergen bolatyn.
Aıta keteıik, Fırdoýsı aýyly 1981 jyly qurylǵan. Eldi mekenniń jer kólemi 1357 gektardy, onyń ishinde egistik jerdiń kólemi 1279 gektardy quraıdy, 2377 turǵyn turady. Aýylda mektep, balabaqsha, medısına pýnkti bar. Sonymen qatar, 182 sharýa qojalyǵy, 2 mal bordaqylaý alańy, 2 saýda núktesi, maqta tútý sehy men dıirmen jumys isteıdi.