Bıyl Aqtóbe qalasynda qala ishindegi joldarǵa ortasha jáne kúrdeli jóndeý jumystary oıdaǵydaı júrgizilip keledi, - dep jazady Egemen.kz.
Bul ister karantındik tártip pen sanıtarlyq-epıdemıologııalyq talaptardyń jáne qaýipsizdik sharalarynyń muqııat saqtalýy jaǵdaıynda júzege asyrylýda. Osylaısha jumys aýqymy belgilengen kestege saı atqarylýda.
Qalanyń ortalyq aýmaqtaryna qosa onyń kóne bóligindegi joldardy jóndeý jumystary da qolǵa alynǵany turǵyndardyń rızashylyǵyn týǵyzyp otyr. Biz taıaýda Aqtóbedegi osyndaı baıyrǵy mekenjaılardyń biri – Turǵynúı qalashyǵy aýdanynda bolyp, naqty istiń jaı-kúıimen tanysqan edik. Eski de bolsa halyq tyǵyz qonystanǵan bul mańaıdaǵy jóndeý jumystaryn júrgizý "Assana-DorStroı" JShS-yna tapsyrylypty. Atalǵan merdigerlik kompanııanyń qurylysshy mamandary keshendi istiń basym bóligin aldymyzdaǵy qyrkúıek aıyna deıin aıaqtaýdy josparlap otyr eken. Iаǵnı, munda sol kezge deıin 1164 metr jolǵa asfalt-beton jabdyqtary tóselmek. Oǵan qosa, búıir tastar ornatylyp, júrgizýshiler men jaıaý júrginshilerge yńǵaıly jaǵdaılar týǵyzylmaq. Ejelgi turǵyndardyń aıtýynsha, atalǵan aýdan aýmaǵyna kiretin keıbir joldardyń jóndeý kórmegenine elý jylǵa jýyqtapty.
Buǵan qosa abattandyrý men kógaldandyrý jumystary umyt qalyp qoıǵanǵa uqsaıdy. Ony jónge keltirý men retteý jónindegiusynys-tilekter jergilikti turǵyndar tarapynan qala jáne oblys basshylaryna da aıtylypty.
Árıne muny orynsyz deýge bolmaıdy. Áıtse de turǵyn úıdiń aınalasyn taza ustaý, tal-terekter men aǵashtar otyrǵyzý, múmkindigine qaraı qoldan keletin ózge de jeńil-jelpi abattandyrý jumystarymen aınalysý – turǵyndardyń ózderine de qatysty ekeni eshqandaı talas týǵyzbaıdy. Eger olar kóldeneń jatqan kesekti alý qajet dep tappasa, abattandyrý isindegi problemalar qordalanyp qalmaǵanda qaıtedi? Turmys mádenıeti usaq-túıek deýge múldem bolmaıtyn uqypty sharýaqorlyq kózqarastan bastalsa, qansha jyl ótse de Turǵynúı qalashyǵy aýdany aýmaǵy dál qazirgi kúıdegideı ybyrsyp, ashylyp-shashylyp ketpegen bolar ma edi degen oı keledi.
Degenmen, qazirgi kúni turǵyndar tilegi aıaqsyz qalmaı, eski qalashyqty qaıtadan jańǵyrtý jónindegi joba jasaqtalǵanyn da atap aıtýǵa turarlyq. Soǵan sáıkes eń aldymen bıylǵy jyly kóne qalashyq aýmaǵyna kiretin aýlalarǵa da asfalt tóselmek. Rasynda da baıyrǵy turǵyndar atap kórsetkendeı munda bul baǵyttaǵy jumystar elý jyl ýaqyt boıy tasadan qalyp kelipti. Onymen aınalysý jónindegi oı buǵan deıin eshkimniń basyna kirip-shyqpapty. Buǵan qosa fýtbol men kóshe gımnastıkasyn jasaýǵa múmkindik beretin – vorkaýt alańdar ornatylmaq.
Osylaısha kóne qalashyqtyń elý jyldan beri jınaqtalyp qalǵan máseleleri men problemalary birtindep qalpyna keletin bolady. Onymen irgeles 312-inshi atqyshtar dıvızııasy dańǵyly boıynda avtokólik joldaryn basqarýdyń tehnıkalyq quraldary ornatylýda. Aldaǵy tamyz aıynda Shyǵanaq Bersıev pen Qazaqstannyń 30 jyldyǵy kóshelerindegi asfalt pen jaıaý júrginshiler joldaryn ornatý jumystary da tolyqtaı aıaqtalmaq. Osylaısha eski qaladaǵy jańa jobalar jalǵasyn taba bermek dedi gazet tilshisine Aqtóbe oblysynyń ákimi Ońdasyn Orazalın.