Qaýipti indettiń tirkelýinen aldyńǵy orynǵa shyqqan Atyraýǵa jedel járdem berýge reseılik dárigerler de bet burdy. Aldymen kórshi elden alty dáriger kelgen edi. Olardy oblys ákimi Mahambet Dosmuhambetov qabyldap, Atyraýda qalyptasyp otyrǵan epıdemııalyq ahýaldy túsindirdi.
– Elimizde qazir koronavırýspen birge pnevmonııa derti de ýshyǵyp tur. Osy aıda oblystyq aýrýhana janynan 400 oryndyq ınfeksııalyq stasıonar ashylady. Al Qurmanǵazy aýdanynda qosymsha oryndar jasaqtalyp jatyr. Biz qajetti stasıonarlyq orynmen, dári-dármekpen, qural-jabdyqpen tolyqtaı qamtamasyz etemiz. Bizge ashylyp jatqan stasıonarlyq oryndarda naýqastardy emdeıtin tájirıbeli dárigerler kerek. Jyldar boıy túıindi máselege aınalǵan medısınalyq mamandardyń tapshylyǵy qazirgi kezde anyq baıqaldy. Soǵan qaramastan, qazir bizdiń dárigerlerimiz aldyńǵy shepte aıanbaı eńbek etýde. Degenmen birazy qaýipti indetti juqtyrdy, qalǵany indetpen kúresý ústinde. Atqarar jumys kóp. Bizge sizderdiń tájirıbelerińiz, bilimderińiz ben bilikterińiz qajet bolyp tur, – dedi oblys ákimi.
О́tken aptada óńir basshysy Mahambet Dosmuhambetov Reseıdegi Astrahan oblysynyń gýbernatory Igor Babýshkınmen medısına qyzmetkerlerin Atyraýǵa shaqyrý týraly kelisim jasaǵan bolatyn. Munaıly óńirmen qońsy qonǵan Astrahannan kelgen bes dárigerdi jalaqymen, jatyn ornymen, tamaqpen qamtý, júrip-turý máseleleri tolyq sheshimin tapty. Qazir olar da qaýipti indetti juqtyrǵan naýqastardy emdeýge kiristi. Oblystyq densaýlyq saqtaý basqarmasy basshylarynyń aıtýynsha, reseılik dárigerlerdiń keıbiri aýdandarǵa jiberilýi múmkin.
Astrahandyq dáriger Anna Chepeldiń aıtýynsha, Atyraýda alańsyz jumys isteýge barlyq jaǵdaı jasaldy. Sol sebepten, olar atyraýdyq áriptesterine koronavırýs ınfeksııasyn emdeýge kómektesýge baryn salǵaly otyr. Reseıdegi Korolev qalasynan kelgen dáriger Veronıka Bogomazovanyń pikirine súıensek, eki eldiń koronavırýs ınfeksııasyn emdeý tásilinde aıtarlyqtaı ózgeris joq. Tipti birdeı deýge bolady.
– Bul indetti jeńý – barsha dárigerdiń armany. Naýqastardy emdeý barysynda qazaqstandyq, ne reseılik tásildi qoldaný qajet degen pikirtalas bolmaýy qajet. Alaıda áleýmettik jelilerde eki el dárigerleriniń arasyna alaýyzdyq týdyratyndaı pikirler kezdesip jatady. Máselen, menimen birge kelgen reseılik dárigerlerdiń eshqaısysy «Qazaqstandaǵy koronavırýsty emdeý taktıkasy durys emes» degen málimdeme jasaǵan joq. Árıne bolmashy aıyrmashylyqtar kezdesetin shyǵar. Biraq negizgi terapııa Reseıdegi hattamaǵa sáıkes keledi. Sondyqtan áleýmettik jelilerde tarap jatqan jańsaq pikirlerge senbegen jón, – deıdi ol.
Atyraý oblysy