Bul dál qazir barsha qazaqstandyq fýtbol jankúıerin alańdatqan saýal desek, artyq aıtqandyq emes shyǵar. О́ıtkeni pandemııaǵa baılanysty el birinshiligi osymen ekinshi ret keıinge shegerildi. Naýryzda bastalǵan chempıonat eki týrdan soń ýaqytsha toqtatylsa, birinshi shildede qaıta jalǵasqan dop dodasy úshinshi týrdan keıin eldegi karantın jaǵdaıyna baılanysty taǵy da belgisiz merzimge kóshirildi.
Búginde fýtboldyń basy-qasynda júrgen atqaminerler myna jaǵdaıda qaıtsek ishki chempıonatty jalǵastyramyz dep bas qatyryp jatyr. Qazaqstan kásipqoı fýtbol lıgasynyń basshylyǵy túrli nusqalardy oılastyryp, eń ońtaılysy degendi klýb jetekshilerine jiberýde. Máselen, eldegi epıdemııalyq jaǵdaıǵa baılanysty arnaıy jospar ázirlenip, klýb basshylaryna OLIMPBET-fýtboldan Qazaqstan chempıonatynyń birneshe týryn bir qalada ótkizýge usynys jasaldy. Arnaıy qurylǵan Komıssııa dop dodasyn Almaty jáne Talǵar qalalaryndaǵy tekserýden ótken 4 stadıonda shildeniń 24-inen bastap jalǵastyrýdy kózdep otyr. Alaıda birneshe komanda chempıonatty bastaýǵa qarsylyq tanytqan.
Olardyń arasynda alty dúrkin el chempıony «Astana» komandasy da bar. О́ıtkeni qazir elorda ujymynda negizgi quramnyń tórt fýtbolshysy pnevmonııamen, taǵy tórteýi koronavırýspen aýyryp jatyr. Onyń ústine klýbtyń negizgi stadıony sanalǵan «Astana Arenada» áli kúnge deıin ishki qurylys jumysy bitpeı jatyr. Osylardy eskergen «Astana» basshylyǵy birinshilikti keıinge shegere turýǵa nıetti.
Al Lıga basshylyǵy tamyz aıynyń ortasynda bastalatyn Eýrokýbok básekesine qatysatyn komandalar sál bolsa da oıyn tájirıbesin jınap úlgersin degen nıetpen birinshilikti meılinshe erte bastaýǵa tyrysyp baǵýda. Degenmen bul jospar áli Mádenıet jáne sport mınıstrligi men Densaýlyq saqtaý mınıstrliginde talqylanyp jatyr. Eger jaýapty mekemeler bul usynysqa kelisim bermese, ishki chempıonat karantın aıaqtalǵanyn kútýge májbúr bolady.
Al Birinshi lıga komandalary arasyndaǵy chempıonatty eki konferensııaǵa bólip, tek qana bir aınalym ótkizý usynyldy. Bul lıganyń kezdesýlerin de bir lokasııada ótkizý josparlanýda, atalǵan oryn keıin belgili bolady. Qazaqstan Kýbogyn ótkizý joldary OLIMPBET-fýtboldan Qazaqstan chempıonaty jalǵasqannan keıin qarastyrylady.
Eske sala keteıik, fýtboldan Qazaqstan chempıonatynyń úshinshi týrynan keıin «Qaırat» 9 upaımen kósh bastap keledi. Ekinshi jáne úshinshi oryndy 7 upaıy bar «Tobyl» men «Shahter» klýbtary bólisip tur. Almatylyq ujym basqa klýbtarǵa qaraǵanda bir týr artyq ótkizgen.