Túrkistan oblysynda jergilikti mańyzy bar avtomobıl joldary men eldi meken kósheleriniń uzyndyǵy 17 364,4 shaqyrym. Bıyl óńirde qurylys-jóndeý jumystarymen jalpy 541 nysan nemese 1 295,6 shaqyrym jol men eldi meken kóshelerin qamtý kózdelgen. Jyl sońynda 526 nysan nemese 1 015,9 shaqyrym jol paıdalanýǵa beriledi, - dep habarlaıdy Egemen.kz.
Túrkistan oblysynyń ákimi О́mirzaq Shókeevtiń tapsyrmasyna oraı, negizgi basymdyq oblys aýmaǵyndaǵy halqy tyǵyz ári shekara mańynda ornalasqan ońtústik aýdandardyń (Shardara, Maqtaaral, Jetisaı, Keles jáne Saryaǵash) avtomobıl joldarynyń jaǵdaıyn jaqsartý máselesine berilýde. Bul rette, qazirgi tańda "Túrkistan-Shardara" baǵytyndaǵy oblystyq mańyzy bar KH-8 "О́zbekstan shekarasy-Shardara-Arys-Temirlan" avtomobıl jolynyń jalpy 162,6 shaqyrymynda jáne jol boıyndaǵy 8 kópirde jóndeý jumystary júrgizilýde.
Atalǵan jumystar aıaqtalǵan kezde oblys ortalyǵy men ońtústik aýdandar arasyndaǵy araqashyqtyq 120 shaqyrymǵa deıin qysqaratyn bolady. Osy aralyqtaǵy joldyń 145 shaqyrymy aǵymdaǵy jyly tolyq aıaqtalady dep josparlanýda.