Búginde Taraz qalasyndaǵy irgetasy 1952 jyly qalanǵan №4 orta mekteptiń jańa ǵımaraty boı kóterýde, - dep habarlaıdy Egemen.kz.
Atalǵan bilim nysanynyń qurylysyn júrgizýshi merdiger kompanııa "Birlik Servıs ı Ko" jaýapkershiligi shekteýli seriktestigi. Mektep 180 oqýshyǵa arnalǵan. Jańa joba boıynsha munda akt zaly, sport zaly, ashana, sheberhanalar salynady. Aıta keterligi, eski ǵımarat jobasynda bul bolmaǵan. Sondaı-aq, №2 orta mekteptiń ornyna da jańa oqý oshaǵy salynatyn boldy. Negizinen 318 oqýshyǵa arnalǵan bilim nysanynyń eski ǵımaraty buzyldy.
Merdiger "Talas Qurylys" kompanııasy atalǵan nysandy keler jyldyń basynda tapsyrýdy josparlap otyr. Jańa ǵımarat ashana jáne májilis zalymen qamtylady.
№16 orta mektep úsh ǵımarattan turady. Bir ǵımarat buzylyp, ornyna jańa ǵımarat salynatyn boldy. Al, ekinshi ǵımarat jóndeýdi qajet etýde. Qurylys jobasyna saraptama qorytyndysy birer kúnde daıyn bolady. Qorytyndy daıyn bolǵan soń qurylysshylar birden jumysqa kirisedi dep josparlanýda.
Úshinshi ǵımarat ázirge jaramdy kúıinde. Jambyl oblysynyń ákimi Berdibek Saparbaev jańa salynyp jatqan bilim nysandaryn aralap kórip, merdigerlerge bekitilgen qurylys merzimderiniń saqtalý kerektigin atap ótti. Mektep alańdaryn abattandyrý da mańyzdy mindetteriniń biri ekenin eskertti. Sonymen qatar, mektep dırektorlaryna da birqatar máselelerdi aıtty.
"Eń bastysy – biz balalarǵa jaıly jáne qaýipsiz jaǵdaı jasaýymyz kerek. Oqýshylar jańa jabdyqtalǵan kabınetterdi kórip, marqaıyp qalýy tıis. Oblysta apatty jaǵdaıdaǵy, úsh aýysymdy jáne oryn tapshylyǵy bar mektepterdiń máselesi kezeń-kezeńimen sheshilýde. Sonymen qatar, bul rette materıaldyq bazaǵa ǵana emes, muǵalimderdiń sabaq ótý tásili men sapaly bilim berý jaıyna da aıryqsha nazar aýdarý kerek", - dedi Berdibek Saparbaev.
Jambyl oblysy