Aımaq basshysy Arhımed Muhambetov pen Máskeý meri Sergeı Sobıanınniń jeke kelisimimen Qostanaıǵa Reseı astanasynan 15 dáriger keldi. Olardyń ishinde pýlmonolog, hırýrg, anestezıolog-reanımotolog, ınfeksıonıst, epıdemıolog, rentgenolog, dáriger-zerthanashylar bar, dep jazady Egemen.kz
Tótenshe jaǵdaı kezinde medısınalyq kómek kórsetýge mamandanǵan arnaıy brıgadany N.V. Sklıfosovskıı atyndaǵy ǴZI-diń hırýrgi Oleg Chernysh basqarady. Top quramynda Máskeý qalasyndaǵy 8 medısınalyq mekemeniń qyzmetkerleri bar.
Reseılik mamandar Qostanaı oblysynda 2 apta bolady. Jergilikti dárigerlerge keńes berip, koronovırýs ıefeksııasyna qarsy kúreske úles qosady. Brıgadalar Qostanaı jáne Rýdnyı qalalaryndaǵy provızorlyq jáne ınfeksııalyq stasıonarlarda jumys isteıtin bolady.
Búgin máskeýlik dárigerler oblys ákimi A.Muhambetovtyń qabyldaýynda boldy. Kezdesý barysynda aımaq basshysy oblysta indetke qarsy qabyldanyp jatqan sharalar týraly áńgimelep, pandemııany eńserýde ekijaqty yntymaqtastyqtyń áli de jalǵasa túsetindigine senim bildirdi.
Oleg Chernyshtyń aıtýynsha, brıgada 3 baǵytta jumys isteıtin bolady. – Birinshiden, qostanaıslyq áriptesterimizge keńes berý, ekinshiden, koronovırýspen aýyrǵan naýqastardy emdeý, úshinshiden, jergilikti dárigerlerge dáris ótkizý, - dedi máskeýlik delegasııanyń basshysy.