Jýyqta brıtandyq táýelsiz basylym, kúndelikti jaryq kóretin «Independent» ınternet-gazetinde Dındım atty pıngvın men Soltústik Amerıka qurlyǵyndaǵy Argentına respýblıkasy Patagonııa shtatynyń turǵyny Jýan Pereıra de Soýza arasyndaǵy tatýlyq qatynas jaıly qyzyq oqıǵa jarııalanypty.
Joǵarydaǵy ınternet-gazettiń jazýyna qaraǵanda magellan tuqymdas pıngvın jyl saıyn bes myń shaqyrym joldy kókteı ótip, jan-janýardyń túlegi bastalatyn kóktemniń sońǵy aılarynda patagonııalyq dosy Jýanǵa keledi. Osynshama uzaq ári qaterli joldy basyp ótýine oǵan eshqandaı kedergi joq. Patagonııalyq bolsa teńizderdi keship ótip keletin «dosyn» jyl saıyn asyǵa kútetin kórinedi.
Bul ekeýiniń bulaısha saǵynsa qaýyshýyna sebep bolǵan oqıǵa: 2011 jyly patagonııalyq azamat Rıo-de-Janeıro qalasyna jaqyn jerdegi jaǵalaýda kúnge qyzdyrynyp jatyp, munaıdyń qaldyq maıyna túsip ólimshi kúıge jetken pıngvınniń jas tóline tap bolady. Ony maıdan tazalap, tamaqtandyryp kútip baǵady. Qysqasy, ólimnen arashalap qalady.
Kúzge salym kúılengen pıngvın óz úıirimen birge alys saparǵa attanyp ketedi de, kelesi kóktemde qutqarýshysy Jýan Pereıra de Soýzany qaıta izdep keledi. Atalǵan oqıǵaǵa mán berip zerttegen jergilikti bıolog Paýlo Krajevkııdiń aıtýynsha, alystan at aryltyp kelip qutqarýshysyn kórgen pıngvın ıt sııaqty qysqa quıryǵyn shoshańdatyp, qýanǵannan shyńǵyra qurqyltaılap qushaq jaıa umtylady eken.
Bir qyzyǵy, bul pıngvın qutqarýshysynan basqa jan balasyna jolamaıdy. Al Jýan bolsa, ony tamaqtandyrady, jýyndyryp kútip baǵady. Túlep bolǵan soń úıirimen birge Otty jerge aıaldap, Perý jaǵalaýyn janaı ótip, Folklend jáne Hýan-Fernandes araldary mańynda qysty ótkizedi de, túler tusta salyp uryp qutqarýshysyna keledi. Qazir 9-10 jas shamasyndaǵy bul magellan pıngvıni ári ketse 25 jyl jasaıdy deıdi bıologtar.