Fýtboldan qyrkúıek aıynda bastalatyn Ulttar lıgasynyń elimizdegi alǵashqy matchy Almatynyń Ortalyq stadıonynda ótetin boldy. Bul týraly Qazaqstan fýtbol federasııasy ulttyq qurama komandalary departamentiniń dırektory Qaırat Nurdáýletov málimdedi.
Negizi buǵan deıingi matchtar elordadaǵy «Astana Arenada» ótip júrgeni barshaǵa belgili. Alaıda jyl basynda ishki jóndeýge baılanysty jabylǵan stadıonnyń qurylys jumystary áli kúnge deıin bitpeı jatqan kórinedi. Sondyqtan QFF basshylyǵy táýekelge barmaı-aq, alǵashqy matchty Almatyda ótkizgendi jón dep sheshipti. «Ulttar lıgasyndaǵy Belarýs quramasyna qarsy oıyndy Ortalyq stadıonda ótkizemiz. Al úıde ótkizetin taǵy eki matchtyń qaıda ótetini áli belgisiz», deıdi ulttyq qurama komandalary departamentiniń dırektory.
Sondaı-aq Qaırat Nurdáýletov ÝEFA basshylyǵy 1000 adamǵa deıin stadıonǵa jankúıer kirgizýge ruqsat bergenin málimdedi. «Árıne eń aldymen barlyǵy sol eldegi epıdemııalyq jaǵdaıǵa baılanysty ekenin eskergen jón. Mysaly, match qabyldaıtyn elde jaǵdaı turaqty dep sanalsa barlyq sanıtarlyq talapty saqtap, jankúıer kirgizýge bolady. Al match indet keń taralyp jatqan elde bolsa onda fýtbolshylar jankúıersiz oınaıdy», deıdi ol.
Aıta keteıik, Qazaqstan quramasy Ulttar lıgasynyń S dıvızıonynda Albanııa, Belarýs jáne Lıtva fýtbolshylarymen bir topta óner kórsetedi.