Shymkent qalasynda jedel-járdem qyzmetinen bólek mobıldik top táýlik boıy qyzmet kórsetip keledi. Emhanalar janynan qurylǵan 58 mobıldi top búgingi kúnge deıin 15000 naýqasqa úıge arnalǵan medısınalyq kómek kórsetken. Bul týraly bastapqy medısınalyq sanıtarlyq kómek kórsetý tobynyń jetekshisi, №5 emhananyń bas dárigeri Jibek Seıdalına málimdedi, - dep habarlady Egemen.kz.
Mobıldi top jetekshisiniń aıtýynsha, shaqyrtýlardyń basym bóligi salqyn tııý, dene qyzýynyń kóterlýi, qurǵaq jótelge baılanysty bolǵan.
"Eki aýysymmen jumys isteıtin medısına mamandary bir kúnde 15-ten astam naýqasty qaraıdy jáne telefon arqyly keńester beredi. Dárigerler pasıenttiń úıine barysymen dene qyzýyn ólshep, tamaǵyn qarap, ókpesin tyńdaıdy. Eger naýqastyń jaǵdaıy aýyr halde bolsa, kezekshi aýrýhanaǵa jetkizedi. Sonymen birge, mobıldi brıgada qyzmetimen dıspanserlik esepte turatyn 38 556 azamatqa dári-dármek úılerine jetkizildi", - dedi Jibek Seıdalına.
Budan bólek, mobıldi brıgada dıspanserlik esepte turǵan 474 444 azamatqa qońyraý shalyp, juqpaly aýrýdyń aldyn alý boıynsha keńester berdi. Atqarylǵan jumystar qaladaǵy epıdemıologııalyq jaǵdaıdyń jaqsarýyna óz áserin tıgizgen.