Tótennen kelgen indettiń halyqty ábden ábigerge salǵany belgili. Osy qıyn jaǵdaıda halyqqa alǵashqy bolyp qolushyn sozǵandar qatarynda volonterler boldy. Olar dárigerlerdi tamaqtandyrý, aýrýhanalarda aýyr ottegi ballondaryn tasý, sanıtarlyq jumys sekildi mindetterge oılanbastan kirisip ketti. Sondaı volonterler qatarynda oraldyq Serik Muqashev ta bar.
Serik aýyr jumystan sharshaǵanyna qaramastan, aýysymy aıaqtalǵan soń aýrýhanadaǵy mindeti, naýqastardyń jaıy men eriktiler týraly aıtyp berýge kelisti. Jumysynyń qanshalyqty qıyn ekenin bilgendikten kóp ýaqytyn almaýǵa tyrystyq. Batys Qazaqstan oblystyq juqpaly aýrýlar aýrýhanasynda tórtinshi jumys kúnin aıaqtaǵan keıipkerimiz jaǵdaıdy ashyq aıtýǵa tyrysty.
– Búgin óte aýyr kún boldy. Dese de jaqsy jańalyqtar da bar. Men kelgen birinshi kúni eki adam, kelesi kúni taǵy bir adam emdelip, aýrýhanadan shyqqan edi. Al keshe úıine qaıtqan eshkim bolmady. Alaıda búgin men isteıtin bólimnen birden 16 adamnyń indetinen aıyqqany qýantty, – dep bastady ol áńgimesin.
30 kún boıy aýrýhanada sanıtar bolyp jumys istegen Serik arnaıy kıimdi kıip júrýdiń ózi ońaı emes deıdi. Vırýstan qorǵaıtyn birneshe qabat kostıýmnen aýa ótpeıtini sonshalyq, adam qobaljyp, tunshyǵyp qalýy ábden múmkin eken. Arnaıy kıimniń ár qabatyn kıgen saıyn qııýlasýy tıis tustaryn taspamen jabystyryp otyrady. Osynyń ózinen medısına mamandarynyń kúndelikti jumysynyń ońaı emesin, erlikke para-par ekenin aıtady.
– Men alǵash kezekshilikke túsken kúni ıntensıvti terapııa bólimine kirýge qorqaqtadym. Kelesi kúni aýrý oshaǵyna enip, barlyǵyn óz kózimmen kórýge bekindim. Sonda myna kostıýmdi saǵattap kıip, naýqastarǵa em-dom jasap júrgen dárigerlerdiń jumysyna basymdy ıdim. Shyqqan soń kıimdi sheshýdiń de óz tásili bar. Silkimeı, jaılap sheship, arnaıy suıyqtyqqa salý kerek. Aıaq kıimdi de jaqsylap tazalaısyń, – dedi ol.
Serik aýrýhanaǵa kelip, barlyq qıyndyqty óz kózimen kórgen soń, osynda bolatyn bir aıynda qyzmetkerlerdiń jumysyn sál bolsa da jeńildetýge tyrysyp, barynsha kómektesetinin jetkizdi. Sanıtarlyq jumystan bólek, óz erkimen kómekke kelgen eriktiler kezekshilik kezinde naýqastyń jaǵdaıy nasharlasa, dárigerdi shaqyrý, emdelip jatqandardyń ári-beri júrip-turýyna kómektesý, dárilerdi alyp kelý degen sekildi kez kelgen jumystan bas tartpaıtyn kórinedi. Keıipkerimiz, tipti, em alýshylar qatty qobaljyp, úreılengen jaǵdaıda psıhologııalyq qoldaý kórsetýge de daıyn ekendigin aýrýhanadaǵylarǵa eskertip qoıypty.
Balalar úıinde tárbıelengen Serik qıyn jaǵdaıda adamnyń qoldaýy qanshalyqty mańyzdy ekenin jaqsy túsinedi. Kóp naýqastardyń saly sýǵa ketip, indetke tótep berýge kúsh-jiger tappaı moıynsunyp qoıatynyn jaqsy bilemiz. Bul kezde naýqasta bárin jeńip shyǵamyn degen senimniń bolýy mamandarǵa da úlken kómek bolady. Vırýs juqtyrǵandar qatarynda ashýǵa boı bergenderi de az bolmaıtyn kórinedi. Serik olardy túsinýge bolatynyn, sebebi vırýs juqtyrǵannan beri aptalap oqshaýlanyp jatqandar jaqyndaryn, týystaryn kóre almaı ábden saǵynady. Egde jastaǵy naýqastardyń bala-shaǵasyn kórgisi kelip, aman-esen ortalaryna oralýdy ańsaıtynyn, aýrýhanadan shyǵatyn sátti asyǵa kútetinin aıtty.
Barshanyń aýzynda júrgen emi joq belgisiz vırýsty juqtyryp aldym degen oıdyń ózi kimge bolsyn ońaı túspeıtini anyq. Sondyqtan eriktilerdiń qoldaýy olardyń ońalyp ketýine sál de bolsyn járdemdesedi. El basyna kún týǵan sátte táýekelge bel býyp indet oshaǵyna attanǵan keıipkerimiz em alyp jatqan adamnyń test synamasy teris shyǵyp, ony estigen naýqas asyǵa jınalyp, esikten shyǵyp jaqynymen qaýyshqan sáti tógilgen terdiń beker emes ekenin dáleldeıtinin aıtady.
Qazaqstan boıynsha Serik sekildi myńdaǵan volonter indetpen kúrestiń alǵy shebinde júr. Olardy raqymdylyǵy, júreginiń jylylyǵy men meıirimi biriktiredi.
Serik Muqashev balalar úıinde tárbıelenip, ómirdiń synaǵyn jastaıynan basynan ótkergendikten, ózgege kómektesýdiń qanshalyqty mańyzdy ekenin biledi.
Mahambet О́temisov atyndaǵy Batys Qazaqstan memlekettik ýnıversıtetiniń 4-kýrs stýdenti S.Muqashev qoǵamdyq ómirge belsene atsalysady. Ol qala ákiminiń orynbasary Baqytjan Narymbetovtiń balalar úıi túlekteriniń máselesi boıynsha shtattan tys keńesshisi ári «Aqjaıyq adaldyq alańynda» qyzmet etedi. Bolashaq horeograf maman oqýdy aıaqtaǵan soń ózin memlekettik qyzmette kóretinin aıtady.
Serik sekildi taǵdyrdyń qıyndyǵyna qaramastan óz jolyn taba bilgen, onymen qosa ózgelerge kómegin aıamaıtyn jastar halyq múddesine qyzmet etemin dep tursa, nege qýanbasqa. Onyń eriktiler qataryna qosylǵanyna jeti jyldaı ýaqyt bolǵan. Bul aralyq oǵan úlken ómirlik mektep boldy.
– Volonter bolýdy kómekke muqtaj jandarǵa esh qaıtarymsyz qoldaý bildirý dep túsinemin. 8-synyptan bastap osy jolǵa bet burdym. Sol ýaqyttan beri jınaǵan tájirıbemdi qazir Oral qalasynda qurylǵan Volonterler akademııasynda oqýshylarǵa úıretemin. Odan bólek ózim sekildi balalar úıiniń tárbıelenýshilerimen, túlekterimen tyǵyz baılanystamyn. Memlekettik organdarmen birlese otyryp olardyń áleýmettik máselelerin sheshýge tyrysamyz. Jıi kezdesýler ótkizip, jastarǵa ózimniń basymnan ótken mysaldar arqyly jaman jolǵa túspeýdi, durys jol tańdap, ómirden ózińdi tabý týraly oıymmen bólisemin. Meniń tájirıbem bireýge sabaq bolyp, týra jolǵa salsa, qýanyshtymyn, – deıdi keıipkerimiz.
Al indettiń oshaǵyna aınalǵan juqpaly aýrýlar aýrýhanasyna barýyna qoǵamda dárigerler men elimizdegi medısına salasy týraly teris pikirlerdiń kóptigi sebep bolypty. Barlyǵyn óz kózimen kóremin dep sheshken volonter bir kúnde eshkimge aıtpaı sanıtar bolýǵa ótinish bildirgen eken. О́zine kerektiń barlyǵyn bir sómkege jınap, belgilengen jerge attanǵan ol bir aı boıy tańerteńnen keshke deıin indetpen arpalysqan jandardyń janynda bolady, olardyń saýyǵyp ketýi úshin aıanbaı eńbek etedi. Bul tájirıbe oǵan ómirlik sabaq bolatyny sózsiz. Qıyn sátte ózin emes, ózgeniń múddesin joǵary qoıa bilgen qaıyrymdy janmen áńgimemizdi «barynsha abaı bolyp, densaýlyǵyńa mán ber» degen júrekjardy tilekpen támamdadyq.