Koronavırýspen kúres sharalaryn kúsheıtip, aımaq halqynyń qaýipsizdigin barynsha qamtamasyz etý úshin 5 shildeden bastap bas sanıtarlyq dárigerdiń qaýlysymen Qyzylorda oblysynda qatań karantındik rejim engizildi. Osyǵan oraı memlekettik mekemeler men quqyq qorǵaý organdary, kvazısektorlyq uıymdar, barlyq aýrýhanalar men emhanalar kúsheıtilgen tásilge saı jumys istep jatyr.
Qajetti sharalardy kúsheıtý maqsatynda oblys ákimi Gúlshara Ábdiqalyqova birqatar aýrýhana men emhanany aralap, týyndaǵan máselelerdi jedel sheshý joldaryn qarastyrýǵa tapsyrma berdi. Qazir shuǵyl qabyldanǵan sharalar nátıjeleri baıqalyp otyr, naýqastar sany tómendep, ahýal birshama turaqtalyp qaldy.
Oblystyq densaýlyq saqtaý basqarmasynyń Facebook áleýmettik jelisindegi paraqshasynda basqarma basshysy Sábıt Pazylov ótken apta ishindegi indetpen kúres jumystaryn saralap ótipti. Qazir óńirdegi 645 oryndyq ınfeksııalyq stasıonarda 421, al 1790 tósektik orny bar provızorlyq ortalyqtarda 964 adam em alyp jatyr. Oryn tapshylyǵy joq. Jaman aıtpaı, jaqsy joq, aıaq astynan aýrýlar qaıta kóbeıse, jeke klınıkalardy da ońtaılandyryp paıdalanýǵa kelisim jasalǵan.
Derti dendegender jıilep, epıdemııalyq ahýal kúrdelene túsken kezeńde Jedel járdem qyzmetine táýligine 2,5 myńnan astam shaqyrtý túsip, júkteme 2 esege artqan bolatyn. Qazir qarbalas sát artta qaldy, shaqyrtýlar sany da azaıdy. Ásirese, dene qyzýynyń kóterilýine baılanysty – 3, pnevmonııamen shaǵymdanýshylar deńgeıi 2,2 ese tómendedi. Osy kúni Jedel járdemge táýligine 1200-1300 qońyraý shalynady.
Quramynda dáriger, orta býyndy medısına qyzmetkeri men kólik júrgizýshisi bar 161 mobıldi top naýqastardy úı jaǵdaıynda baqylaýǵa aldy. Olardyń 100-i aýyl turǵyndarynyń saýlyǵyn baqylasa, 33 top oblys ortalyǵynda, 28-i aýdan ortalyqtarynda qyzmet kórsetedi.
13 shildeden bastap ambýlatorly em qajet etetin pnevmonııaǵa shaldyqqandar úshin Úı jaǵdaıyndaǵy stasıonar qyzmeti qosyldy. Olar №1, 6 qalalyq emhana, «Senim» JShS, Aral, Qarmaqshy, Jańaqorǵan aýdandarynda «Qazaly temirjol» seriktestikterinde jumys istep jatyr. Turǵyndar aımaqtaǵy epıdemııalyq ahýal jaıly apta basynda ashylǵan call-ortalyqtan málimet ala alady. Ortalyqtaǵy 14 adam táýlik boıy halyqqa qyzmet kórsetedi. Sonymen qatar Facebook áleýmettik jelisindegi Jastar densaýlyǵy ortalyǵy paraqshasyna habarlama qaldyrý arqyly aqparat alýǵa da jaǵdaı jasaldy.
Qyzylorda oblysy