Búginde barsha dúnıeni jaılaǵan koronavırýs indeti dúıim jurttyń úreıin alýda. Kóptiń kóńilin kúpti etken kesel talaıdyń taǵdyryn aınalyp ótpegeni de ras. Bul rette qoldan kelgen kómegin aıamaı, kópshilikpen birge bolǵan kásipkerler de jeterlik.
Máselen, Taraz qalasyndaǵy «Kóbesova» jeke kásipkerligi 2011 jyldan beri ottegi ballonyn toltyrýmen aınalysyp keledi. Atalǵan mekeme basshysy Mırash Kóbesovanyń aıtýynsha, osy ýaqytqa deıin olar oblystaǵy 45 aýrýhanany ottegi ballonymen qamtamasyz etip kelgen. Alaıda qazirgideı álemdi ábigerge salǵan qaýipti indet kezinde naýqas jandar úshin ottegi ballondarynyń qajettiligi artqan. Qazirgi kezde «Kóbesova» jeke kásipkerligi Taraz qalasyndaǵy 5 aýrýhanany jáne oblystyń barlyq 10 aýdanynan bir-bir aýrýhanany ottegi ballonymen qamtamasyz etýde. О́zgege ómir syılaýdy maqsat etken kásipker eriktilerdiń kúshimen kún-tún demeı jumys isteýde.
Atalǵan jeke kásipkerlik osy ýaqytqa deıin oblys aýrýhanalaryn kúnine 56 ottegi ballonymen qamtyp kelgen bolsa, búginde bul suranys on esege artypty. Búginde olar 500-600 ottegi ballonyn toltyrýda eken. «Bir mınýtta 1-den 5 ottegi ballonyna deıin toltyramyz. Saǵatyna 250-300 ottegi ballony toltyrylady. Aınalasy eki-úsh saǵattyń ishinde qajet dúnıeni daıyndaýǵa bolady. Degenmen, osy ýaqytqa deıin júk artýshylar máselesi týyndap keldi. Alaıda bul másele de óziniń sheshimin tapty. Kún saıyn eriktiler kómekke kelip, bizge kómektesýde. Sonymen qatar bizge «Qazfosfat» jaýapkershiligi shekteýli seriktestiginiń de kómegi kóp, kómektesip otyrǵan azamattardyń bárine de alǵys aıtamyn», deıdi Mırash Kóbesova. Rasynda da, kún saıyn óńirde ottegi ballondaryna degen suranys artýda eken. Máselen, Qordaı aýdany 25, T.Rysqulov aýdany 30, Merki aýdany 40, Talas aýdany 70 ottegi ballonyna tapsyrys berdi. О́zge aýdandar da óz qajetin suraıdy. Biraq kásipker olardy aýdandarǵa jetkizý jaǵy qıyndaý bolyp turǵanyn aıtady. Jýyrda ǵana Shý aýdanyna jibergen kólik buzylyp, ottegi ballony aýrýhanaǵa ýaqtyly jetpegen. Iаǵnı kólik tapshylyǵy keıde qol baılaıdy eken. Osy jáne ózge de máselelerdi aıtyp oblys ákimi Berdibek Saparbaevqa hat jazǵan kásipker ákimniń tarapynan qoldaý bar ekenin, jýyrda barlyq máseleniń sheshimin tabatynyn aıtady.
Búginde Jambyl jurtshylyǵyna janashyr bolyp, naýqastardy ottegimen qamtyp otyrǵan «Kóbesova» jeke kásipkerligi bul isti ári qaraı jalǵastyra beredi. «Jaqsyda jattyq joq» degendeı, Mıhaıl Platov, Anton Kabakov sııaqty erikti azamattar da bul iske qolushyn sozýda eken. Sonymen qatar «Taraz-Bolashaq» joǵary medısınalyq kolledjiniń quryltaıshysy Qanat Asqarov, kolledj dırektory Aınur Jeksembınova bastaǵan oqý ornynyń qyzmetkerleri de izgilik tanytyp, óz qarajaty esebinen eriktilerge tamaq pisirip, taratýda. Osylaısha qaýipti indetpen kúreste kóp bolyp jumylǵan jambyldyqtar naýqastarǵa úmit syılap, jaqsylyqtyń jarshysy atanyp otyr.
Jambyl oblysy