«Teńiz» kenishinen munaı óndirýdi toqtatpaǵan «Teńizshevroıl» JShS budan buryn da atyraýlyqtarǵa birneshe ret qoldaý kórsetti.
Ásirese qaýipti indetpen kúres bastalǵaly beri jergilikti medısına salasyn demeýge 2 mlrd teńgeden astam qarjy bóldi. Sondaı-aq kompanııa esebinen PTR-test apparattaryn, reanımobılder men jedel járdem kólikterin, termoskanerler men №2 oblystyq ınfeksııalyq aýrýhanaǵa 6 ottegi konsentratoryn satyp alyp berdi. Jaqynda kásiporyn óńirdegi aýrýhanalardy 40 ottegi konsentratorymen qamtydy.
«Bizdiń kompanııanyń basshylary Atyraý oblysyna qosymsha kómek retinde 1 mlrd teńgeden astam qarjy bólýge sheshim qabyldady. Bul qarjy densaýlyq saqtaý salasynyń mekemelerine qajetti qondyrǵylar men qural-jabdyqtardy satyp alýǵa jumsalady» degen edi kompanııanyń Úkimetpen jáne jurtshylyqpen baılanys bóliminiń bas menedjeri Rzabek Artyǵalıev.
О́tken aptada «Teńizshevroıl» Atyraýǵa 1 mlrd teńgeniń dári-dármegi men qorǵanysh quraldaryn ákeldi. Bul júk Atyraý qalasyna taıaý ornalasqan Geolog kentindegi emhananyń qoımasyna túsirildi. Sol jerden ózge emdeý oryndaryna jetkiziledi. «Qorǵanysh quraldarynyń barlyǵy Germanııadan shyǵarylǵan. Onyń arasynda «Tyvek» (Dupont) markaly qorǵanysh kostıýminiń XL mólsherli 5 myń danasy, S mólsherli qolǵaptyń 30 myń juby, shashty jınaqtaýǵa arnalǵan shilterli tordyń 1700 danasy, ókpeni jasandy jeldetý apparatyna arnalǵan medısınalyq betperdeniń (Lowenstein Medical Tehnology Gmbn+Co. KG) M mólsherli 250 danasy jáne osyndaı betperdeniń L mólsherli 250 danasy bar» dep habarlady kompanııanyń baspasóz qyzmeti.
Atyraý oblysy