Premer-Mınıstr Asqar Mamınniń tóraǵalyǵymen ótken Úkimet otyrysynda elektrondy saýdany damytý máselesi qaraldy, - dep habarlaıdy Egemen.kz.
Bul baǵytta atqarylyp jatqan jumys týraly saýda jáne ıntegrasııa mınıstri B. Sultanov jáne sıfrlyq damý, ınnovasııalar jáne aeroǵarysh ónerkásibi mınıstri mindetin ýaqytsha atqarýshy B. Mýsın baıandady.
Bıyl birinshi jartyjyldyqta Qazaqstanda elektrondy saýdanyń bólshek taýar aınalymyndaǵy kólemi bir jarym eseden asa ósti.
Premer-Mınıstr elektrondy saýdanyń perspektıvasy zor ekenin, ári ekonomıkanyń ilespe sektorlary – logıstıkaǵa, konteınerlik tasymaldaýǵa, kýrerlik qyzmetterge, sıfrlyq servıster men qyzmetterge, qolma-qol aqshasyz aınalymǵa, eńbek naryǵyna jáne taǵy basqalarǵa mýltıplıkatıvti áserin tıgizetinin atap ótti.
"Bizdiń aldymyzda elektrondy saýda rásimderin jeńildetip, qarjylandyrýǵa jol ashatyn, ınternet arqyly mámile jasaýǵa senimdilikti nyǵaıtatyn, sondaı-aq kıberqylmystarǵa qarsy áreket etýge múmkindik beretin tıimdi sharalardy qalyptastyrý mindeti tur", - dedi A. Mamın.
Úkimet basshysy 2025 jylǵa qaraı, QR-nyń elektrondy saýda sektorynda aralas salalardy eskere otyryp, shamamen 300 myńnan asa jańa jumys orny men mamandyǵy ashylatyny boljanyp otyrǵanyn jetkizdi. Osy rette, Premer-Mınıstr Saýda mınıstrligine Eńbek mınıstrligimen, "Atameken" UKP-men jáne iri ınternet-dúkendermen birge kásipkerlerdi onlaın-saýdany tıimdi júrgizýge oqytý boıynsha arnaıy baǵdarlama ázirleýdi, sonyń ishinde, osy baǵdarlamaǵa jastardy belsendi tartýdy tapsyrdy.
Saýda logıstıkasyn odan ári tıimdi damytý maqsatynda saýda, sıfrlyq damý mınıstrlikterine fýlfılment-ortalyqtar jelisin jáne qazirgi tańda qurylyp jatqan Ulttyq taýar ótkizý júıesin damytý boıynsha Jospardy úılestirý, al Qazaqstannyń Damý bankimen birlesip onlaın-saýdada jańa nesıelendirý ónimderin qarastyrý máselesin pysyqtaý tapsyryldy.
"Innovasııalyq tehnologııalyq sheshimderdi qoldaný osy saladaǵy zańnamaǵa ózgerister men tolyqtyrýlar engizýdi talap etedi", - dep A. Mamın, sıfrlyq damý mınıstrligine tıisti zań jobasyn ázirleýdi jedeldetip, Úkimettiń qaraýyna aǵymdaǵy jyly usynýdy júktedi.
Úkimet basshysy "bir tereze" qaǵıdaty boıynsha onlaın saýdadaǵy tutynýshylardyń shaǵymdary men usynystaryn qabyldaýdyń Biryńǵaı platformasyn iske qosý jumysyn jandandyryp, tıimdi keri baılanysty jolǵa qoıýdy tapsyrdy.
A. Mamın elektrondy saýdany damytýdyń 2023 jylǵa deıingi Jol kartasyn jandandyrý mindetin qoıdy.