Áıelder kúresinen Qazaqstan quramasynyń bas bapkeri Nurlan Amanqosov álemdegi ahýal jaqsarsa, kúz aılarynda birneshe jarysqa qatysýdy josparlap otyrǵandaryn aıtty.
Nurlan Amanqosovtyń aıtýynsha, qyrkúıek, qazan aılarynda TMD kóleminde ótetin birqatar jarystar bar. Máselen, Belarýs elinde eresekter arasynda Aleksandr Medved atyndaǵy halyqaralyq syn ótedi. Odan bólek, 23 jasqa deıingi sportshylar arasynda da túrli týrnırler bar. Ázirge bul jarystardyń barlyǵy josparda tur.
«Eger eldegi jáne álemdegi indettiń beti beri qarasa, barlyq dodaǵa qatysamyz degen oıdamyz. Al karantın kezinde sportshylar óz úıinde jattyǵýda. Árkim óz betinshe jattyqsa da, kilemdegi, oqý-jattyǵý jıynyndaǵy daıyndyqqa eshteńe jetpeıdi. Tezirek jaǵdaıdyń jaqsarǵanyn kútemiz», deıdi bas bapker.