Qazaqstannyń qurmetti sáýletshisi, "Astana-Báıterek" monýmentiniń avtory Aqmyrza Isauly Rústembekov ómirden ozdy. Qaıǵyly qaza týraly "Almatygenplan" ǴZI habarlady, - dep jazady Egemen.kz
"2020 jyldyń 29 shildesinde Qazaqstan sáýletshiler odaǵynyń prezıdenti Aqmyrza Isauly Rústembekov qaıtys boldy", - delingen habarlamada.
Aqmyrza Rústembekov - Qazaqstan Respýblıkasynyń eńbek sińirgen qaıratkeri, Qazaqstannyń qurmetti sáýletshisi, Shyǵys elderiniń Halyqaralyq sáýlet akademııasynyń korrespondent-múshesi, Qazaq bas sáýlet-qurylys akademııasynyń qurmetti professory, Reseı sáýletshiler odaǵynyń qurmetti múshesi, Qazaqstan dızaınerler odaǵynyń múshesi.
"Astana-Báıterek" nysany úshin ol TMD elderiniń sáýletshiler odaǵynyń Halyqaralyq qaýymdastyǵynyń X-shi halyqaralyq baıqaýynda Gran-prı men altyn medalǵa ıe boldy. 2003 jyly Sofııadaǵy Búkilálemdik sáýlet Trıennalynyń kúmis medalin, 2003 jyly Bishkektegi Sáýlet festıvalinde Gran-prı jáne Qyrǵyz Respýblıkasy Sáýletshiler odaǵynyń altyn medalin ıelendi.