Búginde Taraz qalasynda júrgizilip jatqan qurylys jumystary kóp. Memleket qoldaýynyń nátıjesinde balalardyń sapaly bilim alýyna barlyq múmkindik qarastyrylýda. Ásirese, kóne shaharda bilim oshaqtaryn salý, talaı jyldan beri jóndeýdi qajet etip kelgen mektepterge kóńil bólý máselesi sheshimin tabýda.
Qazirgi talapqa saı, kez kelgen qurylysty júrgizetin merdiger kompanııanyń konkýrs negizinde anyqtalatyny belgili. Sol sııaqty Taraz qalasynda da birqatar merdiger kompanııa ózderine tıesili nysandardy bólip alyp, jumys júrgizýde. Degenmen qazirgi kezde keıbir merdiger kompanııalardyń jaýapsyzdyǵynan jumys júıeli júrmeı tur. Qujat boıynsha qanttaı, al iske kelgende irkilip qalatyn jaýapty mekemelerdiń bul joly da aıtatyn «jyry» taýsylmaı otyr. Biri indetti syltaýratsa, endi biri jumysty sapaly ári ýaqtyly aıaqtaıtynyna sendirip baǵýda. Jambyl oblysynyń ákimi Berdibek Saparbaev Taraz qalasynda aýqymdy jumystyń júzege asýy tıis ekenin, bul rette merdiger kompanııalardyń belsendiligi, jumysqa jaýapkershiligi, qurylys jumysyn kestege saı sapaly ári shıraq júrgizýi asa mańyzdy ekenin eskertken bolatyn. Tipti ózi Taraz qalasynda qurylysy júrip jatqan birqatar áleýmettik nysandardy aralap, merdiger kompanııalardyń jumysyna syn da aıtqan edi. Al bul synnan jańa oqý jylyna deıin nátıje shyǵa ma, joq pa, ol jaǵyn ýaqyt kórsetedi.
Qazirgi kezde Álıhan Bókeıhan atyndaǵy gımnazııanyń 300 oqýshyǵa arnalǵan nysanyn keńeıtý jumysy júrgizilýde. Árıne, memleket tarapynan tıisti qarajat bólinip, barlyq múmkindik qarastyrylsa da mundaǵy jumys negizgi kesteden eki aptaǵa keshigip otyr. Búginde bul jumystyń kólemi 21 paıyzǵa ǵana oryndalǵan. Osyndaǵy qurylys jumystaryn júrgizip otyrǵan «TarazQurylysInvest» JShS ýchaske bastyǵy Qanat Túsipbekovtiń aıtýynsha, biraz jumysshylar syrqattanyp qalǵan. Sondyqtan jumys kesheýildep tur. Alaıda merdiger kompanııanyń ókili negizgi kestede kórsetilgen jumysty ýaqytynda oryndaıtyndaryn jetkizdi. Munda qurylys bıyl naýryz aıynda bastalǵanymen, búginde jumystyń eńserilgen túri kórinbeıdi. Tórt aıdan beri tym bolmasa jumystyń jartysy da bitpegen. Endi bir aıdan keıin jańa oqý jyly bastalady. Sonymen qatar er balalarǵa arnalǵan «Bilim» ınnovasııalyq lıseıinde de 300 oryndyq jataqhanaǵa kúrdeli jóndeý jumystary júrgizilýde. Atalǵan lıseıde 380 erekshe zerek balalar bilim alady. Bilim oshaǵyndaǵy jóndeý jumystaryna «Sanat-Qurylys» merdiger kompanııasy jaýapty. Al atalǵan merdiger kompanııanyń ókili Áset Ahataevtyń aıtýynsha, bul jerde 40-tan astam adam jumyspen qamtylǵan eken. Jumys barysynda ol jataqhananyń aldyndaǵy sport alańdary da jóndeletinin jetkizdi. B.Saparbaev mundaǵy qurylys barysyn da aralap kórip, qarjyny tıimdi paıdalanýdy, jataqhana aldynda ornalasqan oqýshylardyń demalatyn jabyq oryndyqtardy jaqsy bezendirý qajettigin, qurylysty aldaǵy jańa oqý jylyna deıin aıaqtaý kerek ekenin aıtty. Sol sııaqty daryndy balalarǵa arnalǵan oblystyq «Daryn» mektep-ınternatynyń kúrdeli jóndelýine de 200 mln teńge bólingen. Jumystyń sapaly atqarylýyna «Kasýb-Taraz» merdiger kompanııasy jaýapty. Kompanııa dırektory О́rken Aptııalıevtiń aıtýynsha, bul jerde 102 jumysshy eńbek etýde. Jumysshylardyń jalaqylary talapqa saı tólenip, qazir qurylystyń 60 paıyzy aıaqtalǵan. Degenmen oblys basshylyǵy tarapynan ǵımarat syrtynyń kúńgirt ekeni, onyń qara túspen boıalǵany synǵa ushyrady. Shynynda da bul óndiristik zaýyttyń jataqhanasy emes, bolashaq ıeleri tálim alatyn bilim oshaǵy. Sondyqtan da qazyna qarjysyna durys nárseniń jasalǵany jaqsy. Atalǵan maqsatqa 263 mln teńge bólingen. Endi mektep qurylysyna jaýapty merdiger kompanııanyń soǵan saı jumys atqarýy asa mańyzdy. Sol sııaqty Taraz qalasynda 400 stýdent bilim alatyn Jambyl ındýstrıaldy-tehnologııalyq kolledjinde de jóndeý jumystary júrgizilýde. Atalǵan kolledjdiń stýdentteri avtokólik jóndeý, dánekerleýshi, ekskvatorshy sııaqty jumysshy mamandyqtary boıynsha bilim alady. Munda úsh mamandyq boıynsha dýaldy oqytý júıesi engizilgen. Sonymen qatar atalǵan kolledj Elbasynyń qoldaýymen júzege asqan «Jas maman» jobasyna Jambyl oblysynan engen bilim nysany. Taǵy da Taraz qalasyndaǵy Ǵanı Muratbaev atyndaǵy orta mektepte de kúrdeli jóndeý jumystary júrgizilýde. Munda 750 oqýshy bilim alsa, 50 bala shaǵyn ortalyqqa barady. Jańa oqý jylyna deıin atalǵan nysannyń qandaı sapada aıaqtalatynyn ýaqyt kórsetedi.
Shynynda da mektep qurylysyna jaýapty merdiger kompanııalardyń jumysynyń júıeliligi asa mańyzdy. Jańa oqý jylynyń jaqyndap qalǵany óz aldyna, sapanyń da alatyn oryny orasan. Áıtpese, keıde jaz boıy júrip, kúz kelgende arpalysyp bitirip, aqyry nysannyń sapasyna kóńil bólinbeı jatatyny da shyn. Máselen, jýyrda ǵana qala ákimi Aıtqazy Qarabalaev «Qant zaýyty» alqabyndaǵy 600 oryndyq №22 mekteptiń qurylys jumystarymen tanysyp, merdiger kompanııanyń jumysyn synady. Rasynda da munda tehnıka joq, adam kúshi az. Qurylys basynda aınaldyrǵan on shaqty adam júr. Qala ákiminiń «Taýyq qora salyp jatyrsyńdar ma? Álde saraı salyp jatyrsyńdar ma? Mynandaı jumys bolmaıdy ǵoı» degen beınejazbasy áleýmettik jeli arqyly tarap, biraz merdiger kompanııanyń jumysynyń júıesizdigin ashyp bergendeı bolyp edi. Sondyqtan da árbir kompanııa óziniń jumysyna jaýapkershilikpen qarap, ony jergilikti ákimder óz qadaǵalaýyna alyp, naqty jumysty talap etip otyrsa, kóptegen máseleniń kúrmeýi sheshiletini anyq.
Jambyl oblysy