Grek-rım kúresinen tuńǵysh Olımpıada chempıony, Qazaqstan Respýblıkasynyń Eńbek eri - Jaqsylyq Úshkempirov qaıtys boldy, - dep habarlaıdy Egemen.kz. Bul týraly Qazaqstan grek-rım, erkin jáne áıelder kúresi federasııasy habarlady.
"Grek-rım kúresinen tuńǵysh Olımpıada chempıony, Álem chempıony, Qazaqstannyń eńbek eri, "Barys", "Qurmet" "Parasat" ordenderiniń ıegeri Jaqsylyq Ámiráliuly Úshkempirov aǵamyz baqılyq boldy. Batyr aǵamyzdyń Máskeý Olımpıadasyndaǵy erligine bıyl 40 jyl bolyp edi... Marqumnyń barlyq týǵan-týystaryna, otbasyna, jora-joldastaryna, barsha Qazaqstan kúresiniń jankúıerlerine qaıǵyryp kóńil aıtamyz!", - delingen habarlamada.
Jaqsylyq Úshkempirov 1951 jyly 6 mamyrda Qazaq KSR, Jambyl oblysy, Sverdlovsk aýdany, Chapaev keńsharynda dúnıege kelgen.
Ol grek-rım kúresiniń palýany, sport sheberi (1971), Halyqaralyq sport sheberi (1975), Eńbek sińirgen sport sheberi (1980), altyn medal ıelengen qazaqtan shyqqan tuńǵysh Olımpıada chempıony (Máskeý, 1980), Álem chempıony (1981), álem kýbogynyń kúmis júldegeri (1982), eki dúrkin Keńes Odaǵynyń chempıony (1975, 1980), Qazaq KSR eńbek sińirgen jattyqtyrýshysy.