#3zhańaádet chellendji «Atameken» ulttyq kásipkerler palatasynyń bastamasymen halyq jáne bıznes ókilderiniń arasynda sanıtarlyq normalar men áleýmettik qashyqtyqty saqtaýdy nasıhattaý maqsatynda shilde aıynyń ortasynda qolǵa alynǵan bolatyn. Sodan beri ony qyzý qoldaǵan qaýymnyń qarasy qalyń.
Chellendjge belgili sportshylar, jýrnalıster, blogerler men shoý-bıznes ókilderi qoldaý kórsetti. Bul qatarda Serik Sapıev, Qymbat Dosjan, Ǵalym Baıtoq, Qaırat Ádilgereı, saıasatker Erlan Saıyrov, sondaı-aq belgili kásipkerler men palata qyzmetkerleri bar. Kásipkerler atalǵan áleýmettik marafonǵa qatysyp qana qoımaı, sondaı-aq óz resýrstaryn qoldanyp jatyr.
23 shildede soltústik óńirdiń dúken sórelerinde azamattardy maska kııý, áleýmettik qashyqtyqty saqtaý, qoldy jıi jýyp turýǵa shaqyratyn stıker japsyrylǵan jumyrtqa qoraptary paıda boldy.
#3zhańaádet jalpyulttyq chellendjin «Fırma Alekrı» JShS da qoldady. Aqparattyq japsyrmalary bar ónim «Semeınyı» sýpermarketteri jelisinde satylymǵa shyqty. Soltústik Qazaqstan oblysynyń Kásipkerler palatasynyń dırektory Arman Orazǵulovtyń aıtýynsha, pandemııa jaǵdaıynda mundaı profılaktıkalyq sharalar ár adamnyń ómirlik normasyna aınalýy tıis.
– Búginde bıznes pen qoǵam qıyn jaǵdaıda qalǵany belgili, osy jaǵdaıdan barynsha tez shyǵyp, qalypty ómirge oralýymyz siz ben bizge baılanysty. Osyǵan oraı soltústikqazaqstandyqtardy sanıtarlyq normalardy saqtaýǵa shaqyramyn. Birinshiden, árıne, qoǵamdyq jerlerde maska kııý, áleýmettik qashyqtyqty ustaný jáne qoldy jıi jýyp júrýge shaqyramyz, – deıdi Arman Orazǵulov.
«Alekrı» qus fabrıkasy – Soltústik Qazaqstan oblysynda ǵana emes, sondaı-aq basqa óńirler men kórshi elderge sapaly ónim jetkizetin jumyrtqa óndirýshi iri kompanııa. Jyl saıyn kásiporyn 150 mln dana jumyrtqa men 300 tonna qus etin shyǵarady.
– Biz qashan da salamatty ómir saltyn qoldaımyz. Al qazirgi jaǵdaıda densaýlyǵymyz, búkil adamzat saýlyǵy, demek ekonomıkanyń damýy máselesi birinshi kezekte turǵan shaqta mundaı profılaktıkalyq sharalar eshqashan artyq bolmaıdy. Osy ádetter boıǵa neǵurlym tez sińse, qalypty ómirge soǵurlym tez oralamyz. Sondyqtan barsha adamdy qoǵamdyq oryndarda maska kııý, eki metrdeı araqashyqtyq saqtaý, qoldy sabynmen jýyp turý syndy qarapaıym qaýipsizdik sharalaryn ustanýǵa shaqyramyn. Sonymen qatar áriptesterimdi, kásipkerlerdi osy aksııaǵa atsalysýǵa shaqyramyn, – deıdi «Fırma Alekrı» JShS dırektory Aleksandr Prıadko.
Kásipkerge «Semeınyı» sýpermarketter jelisiniń ókilderi de qoldaý bildirip, syrtynda úndeý japsyrmalary bar jumyrtqa qaptamalary sýpermarket sórelerine qoıyldy.
Mundaı stıkerler Batys Qazaqstan oblysynda «Altyndar» sýpermarketinde otandyq óndirýshiler ónimderi qaptamalarynda da paıda boldy. «Atameken» UKP bastamasyn «Beles» agroholdıngi, «Terekti maı kombınaty» JShS, «Nurjanar» AQ jáne «Rodnık» fırmasy qoldady.
– Qalypty ómirge, buǵan deıingi tynys-tirshiligimizge tez oralǵymyz keledi. Bári óz qolymyzda, kóp nárse ózimizge baılanysty. Batys Qazaqstan halqyn sanıtarlyq normalardy ustanýǵa úndeımiz. Jeke gıgıenanyń qaǵıdalaryn elemeýge bolmaıdy. Osy jańa úsh ádet ómirdiń saltyna aınalsyn», – dep atap ótti Batys Qazaqstan oblysy Kásipkerler palatasynyń dırektory Baqdáýlet Ibraımov.
#3zhańaádet jalpyulttyq chellendji halyq jáne bıznes arasynda sanıtarlyq normalardy nasıhattaýǵa baǵyttalǵan. Qazirgi tańda pandemııa jaǵdaıynda úsh qarapaıym ádetti saqtaý asa mańyzdy. Birinshi – áleýmettik qashyqtyqty saqtaý. Ekinshi – maska jáne qolǵap kııý. Úshinshi – qoldy jıi jýyp, antıseptıkpen zararsyzdandyrý.