Qazaqstandyq mýzykanttar Djochıno Rossını atyndaǵy halyqaralyq baıqaýda birinshi orynǵa ıe boldy. Eń aldymen klassıkalyq mýzykaǵa arnalǵan erekshe formattaǵy bul baıqaý shartynyń ózge báıgelerge qaraǵanda basqasha bolǵanyn aıta ketýimiz kerek. Doda shartyna sáıkes qatysýshylar óz ónerlerin aldymen áleýmettik jelide synap, qazylar alqasy qoıylymdy baǵalaǵanǵa deıin kórermen kózaıymyna aınalýy qajet bolǵan.
О́z kezeginde Jambyl atyndaǵy qazaq memlekettik fılarmonııasynyń memlekettik aǵashty-úrmeli aspaptar kvınteti bul tapsyrmany sátti oryndaǵan. Degenmen osy jerde atalǵan kvıntettiń fınalǵa ótýine jaqyn jerlesteri emes, sheteldik kórermender kóbirek at salysqanyn aıta ketýimiz kerek. Qazylar alqasy biraýyzdan Janat Ermanov jetekshilik etetin bizdiń kvıntetti eń úzdik dep tanyǵan.
«Konkýrsqa álemniń túkpir-túkpirinen ónerpazdar qatysty. Mamyr aıynda bastalǵan baıqaý úsh aı boıy ótti. Bizdiń top qazylardyń nazaryna Jak Iber, Klod Debıýssı, Aleksandr Semlınskıılerdiń kúrdeli shyǵarmalaryn usyndy», deıdi J.Ermanov.
Jalpy bul ónerpazdarymyz joǵarydaǵy marapatqa bir kúnde jete salmapty. Olar osyǵan deıin de kóptegen dástúrli baıqaýdyń laýreattary atanyp kelgen. 2016 jyly kvıntet BELBRAND AWARD halyqaralyq mýzykalyq syılyǵynyń laýreaty atanypty, ol – 19 eldiń 165 úmitkeriniń arasynda ótken estafetalyq jarystaǵy úlken jeńistiń biri bolǵan.
Italııa tórinde jeńis týy jelbiregen kvıntettiń quramynda halyqaralyq, respýblıkalyq baıqaýlardyń laýreattary – Sulýshash Elýbaeva (fleıta), Quralaı Málimbaeva (goboı), Janat Ermanov (klarnet), Sanjar Qadyrbekov (valtorna), Talǵat Sapabekov (fagot) bar.
Baıqaý jeńimpazdaryn marapattaıtyn gala-konsert kelesi jyly Pezaroda ótedi dep kútilýde.