Prezıdenttik jastar kadrlyq rezervi jobasyna qatysqan on myńnan astam jastyń arasynan oza shaýyp, baıqaý kezeńderinen súrinbeı ótkenderdiń arasynda aǵaly-inili Oljas pen Almas Sákenovter de bar. Taıaýda Almasty áńgimege tartýdyń sáti tústi. Ol búginde áleýmettik medısınalyq saqtandyrý jobasynyń ekonomıka, densaýlyq saqtaý memleket-jekemenshik áriptestiginiń mamany.
Bizdiń keıipkerimiz Almas Kókshetaý qalasynda 1985 jyly dúnıege kelipti. 2003 jyly orta mektepti bitirgennen keıin dáriger bolsam degen armany jetelep, ulttyq biryńǵaı test tapsyrǵan eken. Alaıda test qorytyndysy boıynsha jınaǵan upaıy Astana medısına ýnıversıtetine grantqa túsýge jetpeı qalady. Mundaı sátsizdikke moıymaǵan ol qujattaryn Kókshetaýdaǵy medısınalyq kolledjge tapsyryp, grantqa iligedi. Osylaısha, elordada oqysam degen armany oryndalmastaı kóringen-di. Biraq alǵan betinen qaıtpaıtyn Almas keler jyly taǵy da ulttyq biryńǵaı test tapsyrady.
– Medısınalyq kolledjde birinshi kýrsty óte jaqsy aıaqtadym. Sodan keıin jazǵy demalysta daıyndalyp, qaıtadan UBT tapsyrdym. Bul joly jolym bolyp, «Pedıatrııa» mamandyǵy boıynsha Astana medısına ýnıversıtetine grantqa 2004 jyly túsip, 2011 jyly sátti bitirdim. Ekinshi joǵary bilimdi Sh.Ýálıhanov atyndaǵy Kókshetaý memlekettik ýnıversıtetinde Menedjment salasy boıynsha aldym, – deıdi ol.
Almas keıinnen bilimin jalǵastyrý maqsatynda 2016 jyly Ulybrıtanııanyń Esseks ýnıversıtetine oqýǵa túsip, onda jobalardy basqarý salasy boıynsha magıstr dárejesin ıelendi. Bizdiń keıipkerimiz Prezıdenttik jastar kadrlyq rezervin tıimdi joba dep esepteıdi. О́ıtkeni oǵan tapsyryp, oza shapqandar kil «sen tur, men ataıyn» deıtin jastar. Iаǵnı olar jalyndap turǵan shaǵynda eldiń damýyna kúsh salýǵa daıyn.
– Prezıdenttik jastar kadrlyq rezervine ótken jigitter men qyzdardyń ortasha jasy 32 men 33 arasy. Bul neni bildiredi? Iаǵnı olar keminde 8-9 jyl jumys tájirıbesi bar mamandar. Árıne keıbireýlerinde jumys ótili az shyǵar. Qazaqta «Otyzynda orda buzbaǵan, qyrqynda qamal alamaıdy», degen maqal bar ǵoı. Endeshe, 30 jas – tolysqan aqyldyń naǵyz nátıje beretin kezeńi. Al Prezıdenttik jastar kadrlyq rezervke ótken jigitter men qyzdar egemendi memleketimizdiń órkendeýine, halyqtyń ál-aýqaty men ómir sapasyn arttyrý úshin lapyldap daıyn tur. Prezıdenttik jastar kadrlyq rezervi qanshalyqty tıimdi joba ekenin ýaqyt kórsetedi. Taıaýda osy jobaǵa ótkenderdiń 150-i jańa qyzmet ıelenipti. Negizi olar úzdik jastar bolǵandyqtan, bylaıǵy ýaqytta da sol laýazymǵa taǵaıyndalýy ábden yqtımal edi. Degenmen Prezıdenttik jastar kadrlyq rezervi olarǵa jańa múmkindik berip otyr. Qazirgi tańda úzdik shyqqan 300-diń arasynan shamamen onshaqty jas «A» sanattaǵy memlekettik laýazymdarǵa jumysqa ornalasqan. Bul – sol jastardyń 3,3 paıyzy. Muny men ne úshin aıtyp otyrmyn? Bárimizdi «bastyq» qylý qajet emes. Memleketimizge jańa baǵdar berý úshin, ony ári qaraı sıfrlandyrý jáne ekonomıkany jaqsartý úshin laýazymdy oryndarda jańa formatty adamdardyń kóp bolýy qajet, – deıdi Almas.
Almasqa «Tumandy Albıondaǵy» oqýyn támamdaǵan soń, sol jaqta qalyp jumys isteýge múmkindik týǵan. Alaıda Almas óz elinde eńbek etýdi jón kóredi.
– Memleket bergen múmkindikti paıdalanyp, qolymnan kelgenshe elge paıdamyz tıip qalar degen oımen osy jobaǵa qujatymdy tapsyrdym. Árıne eń basynda osy jobaǵa halyq arasynda senimsizdikpen qaraǵandar tabyldy. Qazirgi tańda irikteý prosesi 100 paıyz ashyq ótti dep aıta alamyn. Oǵan árbir irikteý kezeńderinde vıdeo men aýdıo jazbalary dálel, – deıdi Almas.
Búginde kadrlyq rezervke ótken jastar arasynda ózara baılanys ornatylǵan. Olar basy qosylǵan kezde memlekettik máselelerdi talqylap otyrady. Ár sala boıynsha toptar quryp, usynystary men tilekterin ázirleıdi. Ýaqyty kelgende muny tıisti mekemelerge usynbaq. Almastyń aıtýynsha, jobalardyń basym kópshiligi ázirge bastapqy kezeńde.
Almas óz otbasyndaǵy ekinshi ul. Onyń Oljas degen aǵasy jáne eki inisi bar. Oljas qazaq mektebiniń túlegi. Ol Sh.Ýálıhanov atyndaǵy Kókshetaý memlekettik ýnıversıtetin Tarıh, ekonomıka jáne quqyq pániniń muǵalimi mamandyǵy boıynsha támamdaǵan. Eki jyldaı ustazdyq etip, keıinnen marketıng, adam kapıtalyn damytý, memleket-jekemenshik áriptestigi jobalary boıynsha jumys istegen. 2018 jyly AQSh-ta halyqaralyq bilim berýdi damytý mamandyǵynyń magıstri atandy.
Bir qyzyǵy, Oljas ta Prezıdenttik jastar kadrlyq rezervine endi. Jyl basynda Memleket basshysy Qasym-Jomart Toqaevpen jobaǵa ótken 300 jastyń kezdesýinde Oljas Sákenov sóz sóılep, óziniń oıymen bólisken-di.
– Biz qarapaıym otbasynan shyqqanbyz. Ákemizdiń baqıǵa attanǵanyna 19 jyl toldy. О́z kúshimizben shetelderde bilim alyp, elimizge qyzmet jasap júrmiz. Aǵam AQSh-taǵy Pensılvanııa ýnıversıtetinde bilim salasy boıynsha magıstr ataǵyn alǵan. Qazirgi tańda BTC Education kompanııasynda jumys istep júr. Aǵamnyń bilimi men jumys tájirıbesi mol, – deıdi Almas.
Eńbek jolyn stýdenttik kezinen bastaǵan keıipkerimiz óz salasynyń kóptegen satysynan ótken.
– Áýelgi kezde №1 qalalyq aýrýhananyń Nevrologııa men arterııalyq gıpertenzııa bóliminde sanıtar bolyp jumys istedim. Odan keıin 2011 jyly joǵary bilimdi alǵan soń, densaýlyq saqtaý salasyna keldim. Densaýlyq saqtaý mınıstrligine qarasty birqatar uıymda eńbek ettim. Sondaı-aq «Áleýmettik medısınalyq saqtandyrý» jobasynyń ekonomıka, densaýlyq saqtaý jáne memleket-jekemenshik áriptestigin damytý mamany retinde jumys istedim, – deıdi ol.