Lıvan astanasy Beırýtte iri jarylys boldy. Áleýmettik jelilerde taraǵan beınejazbalarda qalany qyzyl tuman basqany anyq kórinedi. Eldiń densaýlyq saqtaý mınıstri apat saldarynan 100 adamnyń qaıtys bolyp, 4 myń turǵynnyń jaraqattanǵanyn málimdedi.
Áli de tabylmaı jatqan adamdar kóp. Mınıstrdiń aıtýynsha, tótenshe jaǵdaılar departamentine jaqyndaryn izdegen adamdar áli de habarlasyp jatqan kórinedi. Túnde jaryqtyń joqtyǵy izdestirý jumysyna kedergi bolǵany aıtyldy. Joıqyn eki jarylys Beırýt teńiz portynda bolǵan. Premer-mınıstr Hasan Dıab apatqa sebep qoımalardyń birinde saqtalǵan 2700 tonna ammıak selıtrasy bolǵanyn habarlady. Bul hımııalyq zat tyńaıtqyshtardyń jáne taý-ken óndirisinde qoldanylatyn jarylǵysh zattardyń quramyna qosylady. Bul zatty saqtaýǵa bolmaıtyndyǵy týraly eskertý qoıma basshylyǵyna sonaý 2014 jyly jasalǵan eken. Qazir jaǵdaıdyń mán-jaıy tekserilip jatyr. El bıligi jaqyn kúnderi kináliler anyqtalyp, jazaǵa tartylatynyn jetkizdi. Jarylys qalanyń astan-kesteńin shyǵarǵan. Zaqymdanǵan ǵımarattar arasynda Prezıdent rezıdensııasy men Premer-mınıstrdiń shtab páteri de bar. Jalpy 10 shaqyrym qashyqtyqqa deıin ornalasqan úılerge áser etken. Kýágerler aınaladaǵy ǵımarattardyń, úılerdiń, kóshedegi kólikterdiń áınegi shaǵylǵanyn aıtqan.
Apat ornynda órt sóndirýshiler men qutqarýshylar jumys istep jatyr. Sondaı-aq el bıligi 5 tamyzdy ulttyq aza tutý kúni dep jarııalady. Lıvandaǵy Qyzyl krest uıymy oqıǵadan keıin birneshe saǵat ishinde jaraqattanǵandarǵa shuǵyl qan kerek ekenin aıtyp, turǵyndardy kómekke shaqyrdy.
Lıvannyń joǵary qorǵanys keńesi Beırýtty apatty aımaq dep jarııalap, astanada eki aptaǵa tótenshe jaǵdaı engizýdi jáne qaýipsizdikti qamtamasyz etý úshin jaýapkershilikti áskerı organdarǵa berýdi usyndy. Keńestiń teledıdardan tikeleı efırde oqyǵan málimdemesinde prezıdent Mıshel Aýnnyń tótenshe jaǵdaımen kúreske bıýdjetten 100 mıllıard Lıvan fýntyn bólgeni belgili boldy. AQSh geologııalyq qyzmeti jınaǵan málimetterge sensek, Beırýttaǵy jarylystyń kúshti bolǵany sonshalyqty, ol jer betinde 3,3 balldyq jer silkinisine teń seısmıkalyq tolqyn týdyrǵan.
Qazaqstannyń Syrtqy ister mınıstrligi Lıvandaǵy dıplomatııalyq mıssııasynyń ǵımaratyna zııan kelgenin málimdedi. Dıpmıssııa qyzmetkerleri japa shekpegen, konsýl azdaǵan jaraqat alǵan. «Qazirgi ýaqytta Qazaqstannyń 113 azamaty Lıvanda konsýldyq esepte tur. Bizdiń dıplomattar olarmen baılanysta, qazaqstandyqtardyń arasynda zardap shekkender joq. О́zderińiz biletindeı, dıplomatııalyq mıssııa keńsesine de zııan tıgen bolatyn, ol aldaǵy ýaqytta qalpyna keltiriledi. Bizdiń qyzmetkerler men olardyń otbasy músheleri zardap shekken joq. О́zderińiz biletindeı, Lıvanda BUU bitimgershilik kontıngenti bar, onyń quramyna 120 qazaqstandyq jaýynger kiredi. Qazir olardyń rotasııa prosesi júrip jatyr jáne aldyńǵy kúni bizdiń qazaqstandyq bitimgerler qyzmet etetin oryndaryna aman-esen jetti», dedi Muhtar Tileýberdi.
Bul joıqyn apatqa halyqaralyq qoǵamdastyq ta birden nazar aýdardy. Ulybrıtanııa, Germanııa, Fransııa, AQSh jáne kórshiles basqa elder basshylary kómek qolyn sozýǵa daıyn ekenderin jetkizdi. Eldegi aýrýhanalar lyq toly. Koronavırýspen kúresip jatqan dárigerler qazir jarylystan zardap shekkenderge kómek kórsetýge jumylǵan. Zardap shekkender sany artyp keledi, qaıtys bolǵandardyń da sany ósýi múmkin. Áleýmettik jeli qalanyń qıraǵan sýretteri men beınejazbalaryna toly. El turǵyndary túrli BAQ-qa bergen suhbattarynda qalanyń qırap qalǵanyn aıtyp jatyr. Bul apat eldegi onsyz da qıyn ekonomıkalyq jaǵdaıdy kúrdelendire túsken. Eldegi kedeılik kórsetkishi 50 paıyzǵa ósken, al birer aı buryn ǵana jastar saıası bılikti jemqorlyq jaılaǵanyn aıtyp qarsylyq bildirgen edi. Odan bólek shahardyń aýa sapasyna qatysty alańdaýshylyqtar da boldy. Turǵyndarǵa úıden shyqpaı, syrtta maska taǵyp júrý týraly keńes berildi. Alaıda aýada eshqandaı zııandy zattyń joqtyǵy belgili boldy. Qala gýbernatory Marvan Abbýd kem degende 10 órt sóndirýshiniń iz-túzsiz joǵalyp ketkenin málimdegen. Ol bul kórinistiń «Hırosıma men Nagasakıdi» eske túsirgenin aıtyp, «bul – ulttyq apat» dep málimdedi. Eldegi jaǵdaıǵa búkil álem qaıǵyryp, Lıvan halqyna jyly lebizderin bildirip jatyr. Jarty ǵasyr boıy dıplomatııalyq qarym-qatynasy úzilgen Izraıl de gýmanıtarlyq jáne medısınalyq kómek kórsetýge daıyn ekenin jetkizdi.