«Embimunaıgaz» AQ-nyń departament dırektory Raýan Sabyrov bala kezinen tarıhı jádigerlerge qyzyǵýshylyq tanytypty. Oıyn balasy bolsa da, ǵasyrlar qoınaýynan syr sherter qundy jádigerlerdi jınaı beripti. Jaqynda óz qorynda saqtalǵan sondaı júzge jýyq jádigerdi «Han ordaly Saraıshyq» mýzeı keshenine syıǵa tartty.
Mýzeı qyzmetkerleri oıylǵan tańbalar beınelengen qysh ydys, qumyra, kezdik, qola jebe sekildi jádigerlerdi bizdiń zamanymyzǵa deıingi IV-VI ǵasyrlardaǵy sarmattar dáýirine jatqyzady.
– Balalyq shaǵym Qyzylqoǵa aýdanynda ótti. Sol kezde balalar qum arasynan taýyp alǵan jebelerdi qoldan jasalǵan sadaqqa qadap, oınap júrgenin talaı kórdim. Tarıhı jádigerlerge qyzyǵýshylyǵymdy qalyptastyrǵan, syry ketse de, syny ketpegen mundaı qundy jádigerler aýyldaǵy úıimizde kóp edi. Osydan birneshe aı buryn «Han ordaly Saraıshyq» mýzeı keshenine kelgenim bar. Sonda mundaǵy jádigerlerdiń kópshiligin elordadaǵy mýzeıge alyp ketkenin estidim. Sol sebepten, úıdegi kolleksııamdy qazaqstandyqtar men el qonaqtary kóptep keletin osy mýzeı keshenine tapsyrýdy uıǵardym, – deıdi Raýan Sabırov.
«Han ordaly Saraıshyq» mýzeı kesheni qyzmetkerleriniń aıtýynsha, sarmat dáýirindegi jádigerler – óte sırek kezdesetin qazyna. Sondaı-aq mýzeı túrki tektes jáne qazaqtyń qoldanbaly mádenıetiniń jádigerlerimen tolyqty. Otandyq munaıshy Raýan Sabyrov mýzeı kesheniniń aýmaǵyna tigilgen kıiz úıdi bezendirýge arnalǵan túlki terisin de qosa syıǵa tartty. Aıtpaqshy, munaıshy jigit tarıhı geologııalyq kartalardy, mıneraldy asyl tastardy da jınap júr. Onyń bul qadamy «Embimunaıgaz» AQ-nyń bas keńsesinde kóne tarıhtan syr shertetin geologııalyq mýzeı ashýǵa sebep bolypty.
Atyraý oblysy