Japonııanyń tehnologııalyq kompanııalary pandemııa bastalǵaly maskamen baılanysty túrli ınnovasııalyq jobalardy usynyp keledi. Osyǵan deıin jazda «salqyndatatyn» maskany tanystyrǵan ónertapqyshtar jaqynda «aýdarmashy maska» oılap tapty.
Jańa ınnovasııalyq maska aıtylǵan mátindi segiz tilge aýdara alady. Plastık pen sılıkonnan jasalǵan aqyldy qurylǵy mobıldi qosymsha arqyly jumys isteıdi. Bul tyń týyndy vırýstan jalǵyz qorǵaı almaıdy, tek medısınalyq maskanyń ústinen taǵýǵa arnalǵan eken. Donut Robotics kompanııasy alǵashynda eldegi áýejaılardyń birine aýdarmashy robottardy jasaýǵa tapsyrys alǵan, alaıda pandemııa saldarynan jumys toqtap qalǵan. Osy kezde joba avtorlary bar tehnologııany qoǵam suranysyna saı beıimdep, jańa týyndyny tanystyrýǵa kirisip ketken. Bir aıda daıyn bolǵan joba Japonııada satylymǵa qyrkúıekte shyǵady. Keıinnen Eýropa, AQSh, Qytaıda da satylýy múmkin.