Kámelettik jasqa jetpeı qylmys jasaǵan balalardy ustaýǵa arnalǵan Almaty qalasynda ornalasqan elimizdegi jalǵyz túzeý mekemesinde búgingi kúni 41 bala jazasyn ótep jatyr.
Atalǵan qylmystyq-atqarý júıesi mekemesinde balalar túrli jumyspen aınalysyp, mádenı-sporttyq sharalarǵa qatysatyn. Karantın bastalǵaly osy gúlbaq balalardyń ermegine aınaldy. Jasóspirimderdi paıdaly eńbekke baýlý jumystary karantın kezinde de bir tolastaǵan joq.
Karantın talaptaryna baılanysty qazir kolonııaǵa kelip óner kórsetetin nemese sporttyq jarystar ótkizetin ónerpazdar men sportshylar qatary sırese de, balalardyń ár kúni kóńildi ótýde. Olardyń eń súıip isteıtin jumystary kolonııa aýmaǵyn kóriktendirý. Qysta qardan jasalǵan nebir músinder men muz qalashyqtar kórik berse, jazda jaıqalǵan gúlder kózdiń jaýyn alady. Mundaı ásemdikti jasóspirimder óz qoldarymen jasaıdy.
Jýyrda LA-155/6 mekemesine osy mekemeniń Qamqorshylyq keńesiniń múshesi T.Tomasov gúl tuqymdary men kóshetterin syıǵa tartqan bolatyn. Bul syılyqty qýana qabyldaǵan jasóspirimder mekeme aýlasyn odan ári kórkeıte tústi.
– Mekemedegi balalar buryn da aýlaǵa raýshan gúlderin otyrǵyzyp, ony ózderi kútip-baptap júretin. Tipten kolonııaǵa kelgen qonaqtarǵa jáne kezdesýge kelgen ata-analaryna ózderi ósirgen alqyzyl gúlderin syıǵa tartatyn. Gúl kóshetterin otyrǵyzýǵa, tuqymynan gúl ósirýge mashyqtanǵan balalar bul jumysty buryn istep kórmegen balalarmen óz tájirıbelerin bólisti. Túzeý mekemesiniń aýlasyndaǵy temir qorshaýda asyr salǵan qoıandardy kútý de balalardyń súıikti isi. Sotty bolǵan balalardy eńbekke baýlý olardyń eńbekqor bolyp ósýine yqpal etedi. Erinbeı eńbek etken adam eshqashan kóshtiń artynda qalmaıdy, – deıdi Almaty qalasy boıynsha Qylmystyq atqarý júıesi departamentiniń bastyǵy Darhan Qanatbekov.