Elimizdiń Syrtqy ister mınıstri Erlan Ydyrysov Qazaqstan men Sıngapýr arasyndaǵy dıplomatııalyq qarym-qatynastardyń 20 jyldyq mereıtoıyna oraılastyrylǵan Qazaqstanǵa sapary aıasynda óziniń sıngapýrlyq áriptesi Greıs Fý hanymmen kezdesý ótkizdi.
Elimizdiń Syrtqy ister mınıstri Erlan Ydyrysov Qazaqstan men Sıngapýr arasyndaǵy dıplomatııalyq qarym-qatynastardyń 20 jyldyq mereıtoıyna oraılastyrylǵan Qazaqstanǵa sapary aıasynda óziniń sıngapýrlyq áriptesi Greıs Fý hanymmen kezdesý ótkizdi.
Búginde Qazaqstan men Sıngapýr isker áriptester bolyp tabylady, túrli salalardaǵy yntymaqtastyq damyp keledi, ózara yqpaldastyqtyń aıtarlyqtaı joǵary deńgeıine qol jetkizildi. Bizdiń elderimiz arasyndaǵy uzaq merzimdi bolashaqqa arnalǵan jemisti yntymaqtastyq negizin Qazaqstan Respýblıkasynyń Prezıdenti Nursultan Nazarbaevtyń 1996 jáne 2003 jyldary Sıngapýrǵa sapary, sonymen qatar, Sıngapýrdyń birinshi Premer-mınıstri Lı Kýan Iýdyń bizdiń elimizge 1991 jyly jasaǵan saparlary qalady. Bul qomaqty negiz ózara tıimdi baǵyttardyń barlyq qyrlary boıynsha yntymaqtastyqty damytýǵa qolaıly jaǵdaı týǵyzýǵa múmkindik berdi.
E.Ydyrysov pen G.Fý ózara múddeli keń aýqymdy ekijaqty máselelerdi, sonymen qatar, aımaqtyq jáne halyqaralyq qaýipsizdik máselelerin talqylady. Sıngapýr Ońtústik-Shyǵys Azııadaǵy jetekshi saýda-qarjy ortalyǵy retinde moıyndalsa, saýda-ekonomıkalyq jáne ınvestısııalyq yqpaldastyq ekijaqty qarym-qatynastyń basym baǵyty bolyp tabylady. Eki eldiń mınıstrleri jahandyq ekonomıkalyq quldyraýǵa qaramastan memleketterimiz arasyndaǵy taýar aınalymy ótken jylǵy kórsetkishpen salystyrǵanda 60 paıyzǵa óskenin úlken qanaǵat sezimimen atap ótti.
Yntymaqtastyqtyń taǵy bir mańyzdy baǵyty – munaı óńdeý salasyndaǵy birlesken jumys. Osylaısha, sıngapýrlyq «Jurong Consultans» kompanııasynyń qatysýymen elimizdiń batysynda iri joba – munaı-hımııa parki júzege asyrylýda. Bas jospar boıynsha túrli polımerler men polıetılender shyǵaratyn tórt zaýyt salynyp, 2016-2018 jyldary qoldanysqa beriledi.
Sonymen qatar, taraptar belgili sıngapýrlyq «Changi Airport International» kompanııasynyń Almaty qalasy janynda jańa áýejaı qurylysy jobasyna qatysýy boıynsha máselelerdi talqyǵa saldy. Kásiptik-tehnıka salasyndaǵy yntymaqtastyqtyń deńgeıi atap ótildi. Osylaısha, «Temasek Faýndeıshn» sıngapýrlyq qordyń qarjylaı kómeginiń arqasynda 2012 jyl boıy tehnıkalyq jáne kásiptik júıedegi 100-den astam qazaqstandyq jetekshi jáne pedagogıkalyq qyzmetkerler Sıngapýrda bilimin kóterdi.
Astanada ótetin EKSPO-2017 halyqaralyq kórmesine jetekshi sıngapýrlyq kompanııalardyń qatysýy kelissózderdiń óz aldyna bólek taqyrybyna aınaldy.
Kelissózder qorytyndysy boıynsha saıası saladaǵy Qazaqstan-Sıngapýr qarym-qatynasyn odan ári keńeıtýge jáne kópjaqty qurylymdar sheńberindegi ózara yqpaldastyqty nyǵaıtýǵa arnalǵan Qazaqstan men Sıngapýr arasyndaǵy О́zara túsinistik pen saıası keńester týraly memorandýmǵa qol qoıyldy.
Kelissózder sońynda ótken baspasóz máslıhatynda E.Ydyrysov Qazaqstan Sıngapýrdyń tabysty áleýmettik-ekonomıkalyq damýyn ózine ıkemdep alyp otyrǵanyn atap ótti. Atap aıtqanda, bizdiń elimizde úkimettik aktıvterdi basqarý boıynsha memlekettik holdıng qurý, sonymen qosa, saıası jáne ákimshilik memlekettik qyzmetkerlerdi qarastyratyn memlekettik qyzmettiń sıngapýrlyq modeliniń elementteri qabyldandy. Tutastaı alǵanda, eki el arasynda ózara áriptestikti tereńdetýge úlken umtylys bar. E.Ydyrysov sıngapýrlyq áriptesine óz eliniń Premer-mınıstri Lı Sıan Lýnǵa Qazaqstanǵa ózine qolaıly ýaqytta kelýge shaqyrýyn tabys etti. Shaqyrý sıngapýrlyq taraptan rızashylyqpen qabyldandy.
Sıngapýrlyq mınıstr óz kezeginde bizdiń memleketterimiz arasynda yntymaqtastyq boıynsha aıtarlyqtaı tájirıbe jınaqtalǵanyn, áriptestikti damytýǵa jaqsy jaǵdaı bar ekenin atap kórsetti.
Sáýlebek BIRJAN.