4 tamyz saǵat 10.21-de “Qarasora 2020” jedel aldyn alý is-sharasyn ótkizý kezinde polıseıler ósimdik tektes esirtki quraldarynyń iri partııasy tasymaldanǵan avtokólikti ustady.
– Polısııaǵa Aqtóbe oblysynyń turǵyndary avtokólikpen esirtki zattaryn tasymaldaıtyny týraly jedel aqparat kelip tústi. Jedel is-sharany júzege asyrý barysynda patrýldik polısııa rotasynyń qyzmetkerleri “Samara-Shymkent” tas jolynyń 842 shaqyrymynda “Dastarhan” kempınginiń janynda Baıǵanın aýdany turǵynynyń basqarýyndaǵy “Lada H-reı” avtokóligin toqtatty. Avtokólik salonynda eki jolaýshy bolǵan. “Bona” qyzmettik-izdestirý ıtimen kólik quralyn sanksııalanbaǵan tintý kezinde avtokóliktiń salonynda ósimdik tektes, jasyl tústi, ózine tán ıisi bar, shamamen bes kelideı esirtki zaty tabyldy. Tergeý amaldary júrgizilýde. Kúdikti Hromtaý aýdandyq PB ýaqytsha ustaý ızolıatoryna qamaldy. Jolaýshylarǵa qatysty bultartpaý sharasy-eshqaıda ketpeý týraly qolhat tańdaldy, – dep túsindirdi oblystyq PD bastyǵynyń orynbasary Qanat Nurmaǵambetov.
Atalǵan fakti boıynsha QR QK 296-baby “Esirtki zattardy ótkizý maqsatynsyz zańsyz paıdalaný” boıynsha sotqa deıingi tergeý bastaldy. Aqtóbe oblysynyń PD qyzmetkerleri “Qarasora” jedel aldyn alý is-sharasy bastalǵannan beri 75 quqyqbuzýshylyqty anyqtady, onyń ishinde bir fakti prıtondy ustaý, tórt ótkizý, jeti ósirý jáne eki saqtaý faktisi jáne 61 qylmystyq teris qylyq.