Senat depýtaty Rysqalı Ábdikerovtiń Qaraǵandy oblysyna jumys sapary Osakarov aýdanymen jalǵasty, - dep habarlaıdy Egemen.kz Senattyń baspasóz qyzmetine silteme jasap.
Atalǵan aýdanda "Aýyl – el besigi" jáne "Jumyspen qamtýdyń jol kartasy" memlekettik baǵdarlamalary aıasynda 40-tan astam joba iske asyrylyp jatyr. Buǵan 3 mıllıard teńge shamasynda qarajat bólinip, 210-ǵa jýyq jergilikti turǵyn jumyspen qamtylǵan.
Senator jańa oqý jylynda qashyqtan oqytý formaty jalǵasatynyn eskerip, bilim berý úderisin qamtamasyz etetin ınternet baılanysynyń sapasyna nazar aýdardy. Sondaı-aq aýdandaǵy mektepterdiń jóndeý jumystarymen de tanysty. Jergilikti atqarýshy organ ókilderi daıyndyq jumystary josparǵa saı júrgizilip jatqanyn jáne oqýshylardyń tolyqqandy bilim alýlary úshin barlyq jaǵdaıdyń jasalatynyn, sonyń ishinde mektepterdiń tehnıkalyq qajettiliktermen qamtylatynyn jetkizdi.
Sonymen qatar Rysqalı Ábdikerov aýdandaǵy medısınalyq mekemelerdiń jáne dárihanalardyń jumysyna, asa qajetti dári-dármekterdiń jetkilikti ekenine erekshe kóńil bóldi. Ortalyq aýdandyq aýrýhanaǵa arnaıy barǵan depýtatqa mamandar medısınalyq preparattardyń jetkilikti ekenin jáne qajetti qory jınalǵanyn aıtty. Búginde aýdan boıynsha koronavırýs juqtyrǵan 142 naýqas tirkelgen. Dárigerlerdiń jankeshtiliginiń arqasynda olardyń 109-y emdelip shyqty. Senator halyqpen keri baılanys ornatýdyń mańyzyna toqtalyp, búgingideı kúrdeli kezeńde onyń ózektiligi arta túskenin tilge tıek etti.
Odan bólek, Senat depýtaty "Qazaqmys" korporasııasynyń "Bórli" kómir razrezine baryp, shahterlerdiń pandemııa kezindegi jaǵdaıymen jáne jumysymen tanysty. Sondaı-aq Jansary aýylynda ornalasqan bıe sútinen qurǵaq untaq óndiretin kásiporynǵa da arnaıy at basyn burdy. Bul jerde 150 adam jumyspen qamtylǵan. Zaýyt basshylyǵymen kezdesýinde depýtat memleket tarapynan aýyl sharýashylyǵyna kórsetilip jatqan qoldaý sharalaryna toqtaldy.
Rysqalı Ábdikerovtiń Qaraǵandy oblysyna jumys sapary áli de jalǵasady. Alda óńir basshylyǵymen kezdesýler jáne taǵy birneshe aýdanǵa saparlar josparlanǵan.