Sıfrlyq damý, ınnovasııalar jáne aeroǵarysh ónerkásibi mınıstrligi qashyqtan bilim berýdi qoldaý maqsatynda uıaly baılanys operatorlarymen birlesip, mektep oqýshylary men stýdentterge jáne muǵalimderge arnalǵan arnaıy tarıftik jospar shyǵarý máselesin pysyqtady.
Vedomstvo basshysynyń mindetin atqarýshy Baǵdat Mýsınniń aıtýynsha, tarıftik josparda otandyq beıne-konferens baılanys júıesin qosa alǵanda, Bilim jáne ǵylym mınıstrligi maquldaǵan otandyq 380 bilim berý resýrsyn shekteýsiz paıdalaný qarastyrylǵan.
«Bilim» tarıftik josparynyń abonenttik tólemi aıyna – 990 teńge. Bul tarıftik jospardy 20 tamyzdan keıin qoldanýǵa bolady. Jańa tarıftik josparǵa qosylý sharttary qazir Bilim jáne ǵylym mınıstrligimen pysyqtalýda. Sondaı-aq baılanys operatorlary 1 GB ınternet trafıgin qosymsha usynady», dedi Baǵdat Mýsın.
Bul is-shara Sıfrlyq damý, ınnovasııalar jáne aeroǵarysh ónerkásibi mınıstrligi, Bilim jáne ǵylym mınıstrligi men baılanys operatorlary arasynda qazaqstandyqtardyń bilim berý resýrstaryna shekteýsiz qosylý jónindegi yntymaqtastyq memorandýmyn qabyldaý nátıjesinde júzege asyrylǵanyn aıtyp ótken jón. Budan ózge mınıstrlik tirkelgen baılanys operatorlarymen birge tıisti taldaý júrgizip, operatorlardyń mektepterdegi ınternet jyldamdyǵyn 8 Mbıt/sek deıin qosý/arttyrý múmkindikterin anyqtady. Osy boıynsha tıisti aqparat jergilikti ákimdikterge joldandy. Jergilikti ákimdikter mektepterdi ınternetpen qamtý boıynsha jumys júrgizýi kerek.