Prezıdent Qasym-Jomart Toqaev óz Joldaýynda: «Sybaılas jemqorlyqqa qatysty qylmys jasalǵan mekemeniń birinshi basshysynyń jaýapkershiligin zańnamalyq jáne normatıvtik turǵydan naqty belgileý kerek», degen bolatyn. Osy oraıda qol astyndaǵy qyzmetkerleriniń sybaılas jemqorlyǵy úshin basshylardyń jumystan bosatylýy, sondaı-aq tártiptik jazaǵa tartylýy jóninde sońǵy kezderi zańnamalyq normanyń oryndalýy barysyna az-kem toqtalǵandy jón kórdik.
Bıylǵy jyldyń 7 aıynda Sybaılas jemqorlyqqa qarsy qyzmet tarapynan memlekettik organdarǵa qylmystyq quqyqbuzýshylyqty jáne basqa da zań buzýshylyqtardy jasaýǵa yqpal etetin mán-jaılardy joıý týraly 1118 usynys joldanǵan. Osy usynystardy qarastyrý nátıjeleri boıynsha 575 tulǵa ártúrli tártiptik jaýapkershilikke tartylsa, onyń ishinde 72-si jumystan, 81-i laýazymynan bosatylǵan. A 68-ine laýazymǵa tolyq sáıkes kelmeý týraly eskertý berilse, 10 tulǵanyń laýazymy tómendetilgen, 145-ine qatań sógis jarııalanǵan.
Baqylaýdyń bolmaýy men baǵynyshtylarymen zań buzýshylyqtarǵa jol bergeni úshin ár túrli deńgeıdegi 250 basshy tártiptik jaýapkershilikke tartylǵan. onyń 46-sy laýazymynan, jeteýi jumystan bosatylǵan.
Osy arada Sybaılas jemqorlyqqa qarsy is qımyl agenttigi taratqan birqatar derekterge toqtala keteıik. 25 shildede Indýstrııa jáne ınfraqurylymdyq damý mınıstrligi Indýstrııalyq damý jáne ónerkásiptik qaýipsizdik komıteti Aqmola oblysy boıynsha departamentiniń basshysy Moldaǵulovqa qatysty sot úkimi zańdy kúshine endi. Osy jyldyń mamyr aıynda ol tulǵalar tobymen aldyn ala sóz baılasý arqyly kásipkerden 700 myń teńge somasynda syıaqy alyp, ónerkásiptik qaýipsizdik salasynda attestat alýǵa qatysty oń sheshim qabyldaýǵa ýáde bergen.
Sheneýnik qylmys jasaǵany úshin QR QK 190-babynyń 3-bóligi 2-tarmaǵy boıynsha kináli dep tanyldy. Sonyń saldarynan oǵan on ese kóp 7 mln teńge mólsherindegi aıyppul tóleý men memlekettik qyzmette laýazym atqarý quqyǵynan ómir boıyna aıyrý jazasy taǵaıyndaldy.
Indýstrııalyq damý jáne ónerkásiptik qaýipsizdik komıtetiniń tóraǵasy Baıtovqa tikeleı baǵynysty qyzmetkerdiń tarapynan jasalǵan sybaılas jemqorlyǵy úshin komıtet basshysyn tártiptik jaýapkershilikke tartý máselesi qaralýy tıis edi. Alaıda komıtet tóraǵasy Baıtov jaýapkershilikke tartylǵan Moldaǵulovqa qatysty sot úkiminiń zańdy kúshine enýine deıin óz erkimen qyzmetinen bosatyldy.
Qostanaı oblysy boıynsha Sybaılas jemqorlyqqa qarsy qyzmet ákimdiktiń birqatar laýazymdy tulǵalaryna qatysty sotqa deıingi tergeý júrgizýde. Olar dúken qurylysyna arnalǵan jer ýchaskesiniń nysanaly maqsatyn zańsyz ózgertýmen jáne sáýlet-josparlaý tapsyrmasyn berýmen aıqyndalǵan laýazymdyq ókilettikterin asyra paıdalandy degen kúdikke ilingen.
23 shildede Qostanaı qalasy ákiminiń ókimimen teris sebepter boıynsha tergeýdegi Qostanaı qalasy ákiminiń orynbasary Fınk atqaryp otyrǵan memlekettik laýazymynan bosatyldy. Eger onyń kinási sotta dáleldense, onda 10 kúntizbelik kún ishinde qala ákimi otstavkaǵa ketýi múmkin.
Sondaı-aq Qostanaı oblysy ákiminiń ókimimen Bilim basqarmasynyń basshysy Symbalıýk óz erkimen jumystan bosatyldy. 29 shildede oǵan baǵynyshty Bilim basqarmasy janyndaǵy «Aqparattandyrý jáne bilim sapasyn baǵalaý ortalyǵy» KMM-niń basshysy Pavlıchenko qyzmetterdi memlekettik satyp alý týraly shart boıynsha kezekti tólemdi jedel aýdarýǵa para alǵany úshin QR QK 367-babynyń 1-bóligi boıynsha sot úkimimen kináli dep tanyldy (úkim zańdy kúshine enbegen).
3 tamyzda ákimshilik quqyq buzýshylyq boıynsha eki sot sheshimi qabyldandy.
Júrgizilgen tıisti jumystardyń nátıjesinde memleket qazynasy 2,2 mln teńgege jýyq eselengen aıyppul esebinen tolyqtyrylmaq.