«Halal» degen jazýy bar shujyqtar haram bolyp shyqty. Mundaı jaǵdaı respýblıkamyzdyń birqatar óńirlerinen anyqtaldy. Máselen, Qaraǵandy qalasyndaǵy iri saýda ortalyqtarynda satylyp kelgen shujyqtar quramynda ishek aýrýlaryn týdyratyn qaýipti bakterııa bar ekeni málim boldy. Bul týraly «31» telearna habarlady.
Jergilikti jerdegi sehta ettiń sapasyn dáleldeıtin anyqtama qaǵazy joq bolyp shyqty. Soǵan qaramastan, bul jerde «musylman shujyǵy» ázirlenip kelgen. Osy bylyqqa baılanysty seh bastyǵy quqyq qorǵaý qyzmetkerlerine jaýap berýde. «Shujyq ónimin shyǵaratyn sehta sanıtarlyq talaptar saqtalmaǵan. Barlyq jeri shań-tozań, las. Tipti órmekshige deıin qaptap júr. Et ónimin jerge qoıa salǵan. Endi biz seh bastyǵyna qatysty qujattardy sotqa jóneltemiz»,- deıdi Oktıabr aýdandyq prokýratýrasynyń bólim jetekshisi Álııa Ansarova.
Almaty qalasynyń turǵyny Saltanat Qanatbek te dúkennen satyp alǵan «halal» shujyǵy ishinen qustyń qaýyrsyndary men polıetılen qapshyǵynyń qaldyǵy shyqqanyn aıtady. Eń soraqysy, dúken sóresinde satylyp kelgen bul shujyqtyń syrtqy qaptamasynda óndirýshi kásiporynnyń aty jazylmaǵan. Satýshy boljamy boıynsha shıkiligi anyqtalǵan shujyq Taraz qalasyndaǵy «Dostar» kásipornyna tıesili kórinedi. Osy máselege baılanysty túsinikteme bergen «Dostar» JShS bas dırektory Saıd Persanýkov bul bylyqty qaskóılerdiń áreketine jatqyzyp, bizdiń seriktestiktiń atyn jamylýshylar bar degendi aıtty. Qalaı degenmen de, halyqty aldap júrgenderdiń tirligi aqtap alýǵa jatpaıtyn keleńsiz kórinis.
Baqytbek Keneshuly.