"Habar" Agenttigi Qazaqstan Respýblıkasynyń Mádenıet jáne sport mınıstrligimen birlese otyryp, fınaly 2020 jyldyń 29 qarashasynda Varshavada (Polsha) ótetin "Junior Eurovision Song Contest" halyqaralyq án baıqaýynyń Ulttyq irikteýine qatysýǵa ótinimderdi qabyldaýdy bastaıdy, - dep habarlaıdy Egemen.kz.
Atalmysh baıqaýǵa Qazaqstannyń osymen úshinshi márte qatysýy - «Habar» Agenttiginiń 2016 jyldan beri Eýropalyq habar taratý odaǵynyń (EVU) qaýymdasqan múshesi atanýynyń arqasynda múmkin bolyp otyr. Bıyl atalmysh baıqaýdyń ótýine elimizdiń Mádenıet jáne sport mınıstrligi qoldaý bildirýde.
Baıqaýǵa 9 jastan 14 jasqa deıingi oryndaýshylar qatysa alady (fınal ýaqyty kezinde - ıaǵnı, 2020 jyldyń 29 qarashasynda úmitkerdiń jasy osy kórsetkishten asyp ketpeýi kerek ).
Ulttyq irikteý 4 kezeńnen turady.
Birinshi kezeń – ótinimderdi qabyldaý. Qatysýshylarǵa saýalnamany toltyryp, ózi oryndaǵan ánniń beınejazbasyn Ulttyq irikteýdiń resmı saıtyna jevision.khabar.kz júkteýi kerek. О́tinimder 20 tamyzǵa deıin qabyldanady.
Ekinshi kezeń – bul halyqaralyq án baıqaýlarynyń jeńimpazdary men tanymal oryndaýshylardan quralǵan ádil-qazy alqalarynyń sheshimimen eń myqty degen 30 qatysýshyny irikteý kezeńi.
Úshinshi kezeń - jevision.khabar.kz saıtyndaǵy onlaın daýys berý satysy. Bul kezeńde qazaqstandyqtardyń árqaısysy ózine unaǵan qatysýshyǵa daýystaryn bere alady. Onlaın daýys berý nátıjesi boıynsha Ulttyq irikteýdiń 12 fınalısi anyqtalatyn bolady.
Tórtinshi kezeń – Ulttyq irikteýdiń fınaly, bul kezeńde elimizdiń eń tanymal degen kompozıtorlarynyń qatysýshylarǵa arnap jazǵan arnaıy ánin oryndaý arqyly, 12 fınalıst ándi sheber oryndaý jaǵynan jarysqa túsedi. Ádil-qazylar alqasynyń bergen baǵasy men SMS daýys berý nátıjesinde jeńimpaz anyqtalatyn bolady. Eń kóp upaı jınaǵan fınalıst Varshavada ótetin "Junior Eurovision Song Contest" Halyqaralyq án baıqaýynda Qazaqstan atynan saıysqa shyǵatyn bolady.
Esterińizge sala keteıik, Qazaqstan "Balalar Evrovıdenıesi" baıqaýyna úshinshi ret qatysýda. 2018 jyly baıqaýǵa Danelııa Tóleshova "О́zińe sen" ánimen qatysyp, altynshy orynǵa ıe boldy. Byltyrǵy jyly Erjan Maksım "Armanyńnan qalma" ánimen ekinshi oryn aldy (qazylar alqasynyń sheshimi boıynsha birinshi oryn).