Májilis depýtattarynyń aımaqtardaǵy jumysy jalǵasýda. Qazaqstannyń túkpir-túkpirinde bolyp, barlyq sala ókilderimen kezdesken depýtattar eń áýeli halyqty áleýmettik qoldaý, eńbekpen qamtý, jergilikti jerlerde memlekettik baǵdarlamalardyń júzege asyrylý jaıyna nazar aýdardy. Bul týraly Egemen.kz Májilistiń baspasóz qyzmetine silteme jasap habarlaıdy.
Máselen, Aqtóbe oblysynda bolǵan Májilis depýtattary Gleb Shegelskıı, Danııa Espaeva jáne Sergeı Sımonov salynyp jatqan «Iýjnyı obhod» nysanynda boldy. Bul nysan búginde 600 den astam aqtóbelikterdi jumyspen qamtýǵa jol ashty. Onyń 200 “jumyspen qamtý jol kartasy” aıasynda ornalasty. Bul jol qurlysy qajettiligi týraly másele erte týyndaǵan. Merdigerlerdiń aıtýynsha, qurlysqa qoldanylǵan materıaldardyń barlyǵy qazaqstandyq ónimder. Onyń deni osy aımaqta óndirilgen.
Májilis depýtattary Elek ózeni arqyly ótetin avtoótkel nysanynda boldy. Merdigerlerdiń aıtýynsha, kópir qurlysy «Mavr» júıesi boıynsha júrgiziledi. Al, Májilis depýtaty Gúlnar Bıjanova Qaraǵandy oblysynda bolyp, Qarqaraly aýdanynda memlekettik baǵdarlama jaıymen tanysty. Jergilikti bılik ókilderiniń aıtýynsha búginde aýdanda jalpy somasy 5 mlrd. 88,9. teńgeni quraıtyn 10 memlekettik baǵdarlama júzege asyrylýda. “Jumyspen qamtý jol kartasy" boıynsha 18 joba qolǵa alynýda. Bul maqsatqa 998 944,0 myń teńge bólinip, 250 jergilikti turǵyn jumysqa ornalastyrylǵan. Sapar barysynda depýtat azamattardy baspanamen qamtý jaıyna da basa nazar aýdardy. Kóp balaly, áleýmettik az qamtylǵan jáne bıýdjettik sala qyzmetkerleri úshin aýdanda 18 páterli, 4 turǵyn úı salynýda. Jalpy «Nurly jer» baǵdarlamasy boıynsha 1 203,2 mln teńgege turǵyn úı salynýda. Aýdanda aýyldyq aýmaqtardy jańǵyrtýǵa baǵyttalǵan «Aýyl-El besigi» jobasyna basa kóńil bólingen. Osy maqsatta birqatar nysandarǵa kúrdeli jóndeý júrgizilýde. Jumys barysynda G.Bıjanova birqatar medısınalyq mekemeler men dárihanalardy aralady.
Elimizde qalyptasqan jaǵdaıǵa baılanysty Qazaqstan halqy Assambleıasy depýtattary da qazaqstandyqtarǵa belsendi qoldaý kórsetti. Depýtat Ahmet Mýradov QHA ókilderimen, kásipkerlermen jáne eriktilermen birge aýrýhanalarǵa qajet quraldar jetkizdi. Kómekke muqtaj jandarǵa azyq-túlik basqa da zattaı kómek kórsetildi. Depýtattar aımaqtaǵy jumystaryn jalǵastyra otyryp, aldaǵy ýaqytta azamattardyń áleýmettik ahýalyn qatań baqylaýda ustamaq.