Shyǵys Qazaqstan oblysy О́skemen qalasynyń sol jaǵalaýyn damytýǵa basymdyq berildi. Bul týraly YK-news.kz habarlady.
Bas jospar boıynsha 20 jyl ishinde sol jaǵalaýda kópqabatty avtoturaq, mektepter, sport alańy men aýrýhanalar boı kóteredi. Osynyń bári 19-shi shaǵyn aýdanǵa shoǵyrlanady. «Qazir biz sol jaǵalaýdan oryn alatyn nysandardyń ınjenerlik ınfraqurylymyn pysyqtaý ústindemiz. Sonyń ishinde sapaly jol salý máselesi de tur. Jospar boıynsha osy aýmaqta birneshe nysandardyń qatarynda 4 mektep pen 9 balalar baqshasy salynady»,- deıdi О́skemen qalalyq sáýlet jáne qurylys bólimi bastyǵynyń orynbasary Dáýren Qasymov.
Bas josparda kórsetilgendeı, joǵaryda atalǵan shaǵyn aýdanda jalpy 130-den asa ǵımarat salynady eken. Solardyń arasynda qalalyq ákimdik, oblystyq prokýratýra men oblystyq sot, kınoteatr boı kóteredi. Al qala turǵyndarynyń qolaıly dem alýy úshin úlken saıabaqtyń aýmaǵy jasyl-jelekpen kómkeriledi.
Danııar Túımebaı.