Shámshi atamyzdyń kózin kórmesem de, ol kisiniń ánderiniń meniń ómirimde alatyn orny óte joǵary. 1968 jyly jazylyp, 44 jyl boıy aqyn M.Shahanovtyń jeke arhıvinde jatyp qalǵan «Súımegender saǵynbaıdy» ániniń alǵashqy oryndaýshysy bolý da men úshin mártebe.
300-den astam án jazǵan kompozıtordyń ánderi jer betinde qazaq degen halyq turǵanda umytylmasy haq. Sol 300 ánniń halyqqa keń taraǵany 40 shaqty ǵana. Bir kompozıtordyń 40-qa jýyq áni «hıt» bolýy qazaq mýzykasynyń tarıhynda bolmaǵan jaǵdaı dep oılaımyn. 2015 jyly Nur-Sultan qalasynda I.Tasmaǵambetovtyń bastamasymen kompozıtordyń 85 jyldyǵy qarsańynda «Ánim sen ediń» atty úlken konsert ótti. Konserttegi barlyq ánderge qoıylymdar qoıyldy. Orkestrge óńdegen keıingi jas býynnyń ishindegi biregeı daryn, talǵampaz kompozıtor Renat Gaısın bolatyn. Men Altynaı Jorabaevamen «О́mir-ózendi», al jeke «Syǵan serenadasyn» oryndadym. Ánniń osy óńdelýi maǵan kompozıtordyń qanshalyqty syǵan halqynyń mýzykasyna tereń boılaǵanyn ańǵartty. Ánniń mýzykalyq qurylymy «syǵansha» mánerdi surap-aq turǵandaı kórindi... О́z oryndaýym kóńilimnen shyqpaǵanyn da jasyrǵym kelmeıdi. Biraq áli talaı múmkindik bolatyn shyǵar degen oıdamyn.
Qaldaıaqov ánderiniń qazaqy boıaýy ýaqyt ótken saıyn qanyǵa túsetindeı. Ulttyq boıaý, ulttyq ún degen biz úshin óte mańyzdy. Al «Syǵan serenadasy», «Dúńgen qyz» sııaqty ánderi sol halyqtardyń únine, aıtylý mánerine yńǵaılanyp jazylǵany jyldar ótken saıyn baıqalyp keledi. Demek, kompozıtordyń eńbegi áli de bolsa zerdeli zertteýlerge suranyp tur. Týǵan topyraǵy Otyrarǵa arnaǵan birneshe ánderiniń shyǵý tarıhy, el arasyna keń taraǵan nemese múldem tanylmaı qalǵan ánderi jaıly áńgime óz aldyna.
Atamyzdyń qanymen, anamyzdyń sútimen boıymyzǵa daryp, jadymyzǵa sińgen Qaldaıaqov ánderi esh ýaqytta el esinen óshpeıdi. Artyna óshpes mol mura qaldyrǵan kompozıtordyń 90 jyldyq mereıtoıy qutty bolsyn!
Jubanysh JEKSENULY,
Qazaqstannyń eńbek sińirgen qaıratkeri, ánshi