Qazaqstan Prezıdenti Indýstrııa jáne ınfraqurylymdyq damý mınıstri Beıbit Atamqulovty qabyldady. Bul týraly Egemen.kz Aqordanyń baspasóz qyzmetine silteme jasaı otyryp habarlaıdy.
Memleket basshysyna Indýstrııa jáne ınfraqurylymdyq damý mınıstrliginiń bıylǵy 7 aıda atqarǵan jumysynyń qorytyndysy, sondaı-aq, memlekettik baǵdarlamalardyń júzege asyrylý barysy týraly esep berildi.
Beıbit Atamqulovtyń aıtýynsha, pandemııa saldarynan týyndaǵan daǵdarys jaǵdaıyna qaramastan mınıstrlikke qarasty salalarda oń nátıjelerge qol jetken. Mınıstr búginde «Nurly jer» baǵdarlamasy aıasynda 7 mıllıon sharshy metr turǵyn úı salynyp, 61,3 myń otbasynyń turmystyq jaǵdaıy jaqsarǵanyn jetkizdi. Sonymen qatar «Nurly jol» baǵdarlamasy boıynsha respýblıkalyq jáne jergilikti mańyzy bar 9,8 myń shaqyrym joldyń qurylysy jáne qaıta jóndeý jumystary júrgizilip jatyr.
Budan bólek jyl sońyna deıin Indýstrııalandyrý kartasyn júzege asyrý boıynsha elimizdiń barlyq óńirlerinde 160 jobany iske qosý josparlanyp otyr.
Kezdesý sońynda Prezıdent óńdeý ónerkásibin odan ári yntalandyrýǵa jáne ishki naryqty tolyq qamtý maqsatynda óńdelgen ónimderdiń úlesin arttyrýǵa qatysty birqatar tapsyrma berdi. Qasym-Jomart Toqaev bıyl paıdalanýǵa beriledi dep josparlanǵan turǵyn úılerdi ýaqytynda tabystaýdyń mańyzdy áleýmettik mindet ekenin aıtty. Sondaı-aq kólik-tranzıt ınfraqurylymyn jańǵyrtý jumystaryn jalǵastyrý qajettigin atap ótti.